गोरखा, २९ चैत । राष्ट्रिय प्रजातन्त्र पार्टी गोरखाले आगामी बैशाख ३० गते हुने स्थानीय तह निर्वाचनलाई लक्षित गरी घरदैलो कार्यक्रम सुरु गरेको छ । राप्रपाले हिजोदेखी गोरखा नगरपालिका वडा नम्बर १ र २ मा कार्यक्रम गरेर घरदैलो कार्यक्रम सुरु गरेको पार्टीका जिल्ला उपाध्यक्ष भीषण अर्यालले जानकारी दिनुभयो ।
वडा नम्बर १ मा भएको घरदैलो कार्यक्रममा वडापार्टी अध्यक्ष राम पनेरु सहित जिल्ला उपाध्यक्ष अर्याल, जिल्ला पार्टीका सल्लाहकार मोहनलाल श्रेष्ठ, नगर अध्यक्ष रुद्रराज पाण्डे , सहसचिव अर्जुन बसन्यात, नगर उपाध्यक्ष सम्झना लामिछानेको सहभागिता रहेको थियो । त्यस्तै पार्टीले वडा नम्बर १ मा आगामी स्थानीय तहको निर्वाचनमा लागि उमेद्वार छनोट गरेको सो पार्टीले जनाएको छ ।
त्यस्तै पालुङटार नगरपालिकाको वडा नम्बर ४ पनि हिजो नै घरदैलो कार्यक्रम गरेको जनाइएको छ । त्यसै गरी गण्डकी गाउँपालिका ३, ७ र ८ मा पनि गण्डकी प्रदेश सदस्य अम्बिका रुपाखेती जिल्ला सदस्य रामचन्द्र दवाडी , गण्डकी गाउँ पालिका राप्रपा अध्यक्ष बद्री रेग्मी लगायतको सहभागितामा घरदैलो अभियान कार्यक्रम गरेको राप्रपाले जनाएको छ ।
