गोरखा, १८ पुस । वैदेशिक रोजगारीमा आकर्षक तलबको प्रलोभनमा पारी अमेरिका पठाइदिन्छु भन्दै रकम ठगी गरेको आरोपमा गोरखाका १ जनालाई प्रहरीले पक्राउ गरेको छ । पक्राउ पर्नेमा गोरखा गण्डकी गाउँपालिका–२ घर भई चितवन भरतपुर महानगरपालिका–१० बस्ने ४३ वर्षीय कुलबहादुर थापा भएको प्रहरीले पुष्टी गरेको हो ।
पक्राउ परेका कुलबहादुरले अर्का १ जना साथीको सहयोगमा अमेरिका पठाइदिन्छु भन्दै पीडितहरूबाट ५९ लाख २५ हजार रूपैयाँ ठगी गरी फरार रहेको काठमाडौं उपत्यका अपराध अनुसन्धान कार्यालय टेकुले जानकारी दिएको छ ।
काठमाडौं उपत्यका अपराध अनुसन्धान कार्यालय टेकुको टोलीले दुबै जनालाई काठमाडौंको सिनामंगलबाट मंगलबार पक्राउ गरेको हो । आवश्यक अनुसन्धान तथा कारवाहीको लागि दुवै जनालाई जिल्ला प्रहरी परिसर काठमाडौं भद्रकालीमा बुझाएको काठमाडौं उपत्यका अपराध अनुसन्धान कार्यालय टेकुले जनाएको छ ।
