काठमाण्डौं १४, चैत- मुलुकको एक मात्र परोपकार प्रसुति तथा स्त्रीरोग अस्पतालमा सुत्केरी हुने महिलाको सङ्ख्यामा कुनै कमी नआएको पाइएको छ । विश्वव्यापी महामारी बनेको नोवेल कोरोना भाइरसका कारण मुलुक लकडाउन भएको बेला यातायातको असुविधा भए पनि प्रसुति गृहमा दैनिक एक सय जना शिशुहरु जन्मने गरेका छन् ।
एम्बुलेन्स, ट्याक्सी र निजी गाडीबाट सुत्केरी हुनेहरु अस्पताल आइरहेकाले अहिले पनि दैनिक झन्डै सय महिलाले शिशुलाई जन्म दिने गरेको अस्पताल निर्देशक डा. जागेश्वर गौतमले बताउनुभयो ।
उहाँले बहिरङ्ग सेवा बन्द भए पनि आकस्मिक सेवा र भर्ना हुने बिरामी नियमित जति नै भएको भन्दै अस्पतालले कार्यरत कर्मचारीलाई मास्क, सेनिटाइजरलगायत आवश्यक सामग्री उपलब्ध गराएर नियमित काममा लगाएको जानकारी दिनुभयो ।
कुरुवालाई भीड नगर्न भनिएको र एक बिरामीलाई एक कुरुवा बस्न भनिएको, कुरुवा र बिरामीका लागि हात धुने व्यवस्था पनि गरिएको उहाँले बताउनुभयो ।
