गोरखा, १३ माघ । गोरखा सदरमुकाममा रहेको गोरखा अस्पतालमा २ दिने निःशुल्क मुटु जाँच शिविर हुने भएको छ । रोटरी क्लब अफ गोरखाको आयोजनामा यही माघ २५ र २६ गते निःशुल्क जाँच शिविर हुने भएको हो । क्लबले आज पत्रकार सम्मेलन गर्दै २ दिनको लागि निःशुल्क जाँच शिविर राखिएकोले सबैलाई जाँच गराउन अनुरोध समेत गरेको छ ।
शिविरका संयोजक किशोरजंङ थापाले पत्रकार सम्मेलनमा जाँच पछी शल्यक्रिया गर्नुपरेको खण्डमासमेत निःशुल्क शल्यक्रिया गर्ने ब्यवस्था गरिएको जानकारी दिनुभयो । उहाँले यो शिविरबाट स्कुले बच्चाहरुमा त्यस्ता समस्या भएको पाइएमा र नेपालमा उपचार संभव नभएका खण्डमा भारतमा लगेर पनि निःशुल्क उपचार गराएर ल्याउने क्लबको ब्यवस्था मिलाएको बताउनुभयो ।
भारतमा उपचारको लागि जादा भने बिरामी र बिरामीका १ जनालाई समेत जाने र आउने निःशुल्क ब्यवस्था मिलाईएको संयोजक थापाले जानकारी दिनुभयो । २ दिनसम्म चल्ने जाँच शिविरमा मुटुरोग बिशेषज्ञ डा.अनिल भट्टराइको नेतृत्व २५ जनाभन्दा बढी चिकित्सक तथा स्वास्थ्यकर्मीको टोली सहभागी हुनेछ ।
रोटरी क्बल अफ गोरखाको आयोजना हुने शिविर सञ्चालनका लागि यसपटक सम्भव नेपाल नामक संस्थाले पनि आर्थिक सहयोग उपलब्ध गराउने भएको छ । केही बर्षदेदि सेभ द हर्टले क्लबसंग समन्वय गरेर निःशुल्क जाँचका साथै शल्यक्रिया गर्दै आएको छ । बर्षेनी शिविरको आयोजना गर्दै आएको क्लब र गोरखा अस्पताल बिच अस्पताल भित्रै हर्ट क्लिनिक स्थापना गर्ने बिषयमा समेत सम्झौता भई सकेको छ ।
यो शिविरमा विगतका बर्षहरुमा जाँच गराएको औषधी खाएका तथा पुनः चेक जाँच गराउनु पर्नेहरु तथा मुटु जाँच गराउन चाहनेहरुले शिविरबाट फाइदा लिन सक्ने संयोजक थापाले बताउनुभयो । उक्त शिविरमा चिकित्सकहरु स्वयंम सेवकका रुपमा आउने भएकाले खाना, आवास र यातायातमा मात्रै क्लबको करिब ६ लाख खर्च हुने अनुमान गरिएको छ ।
बिरामी जाँचपछि औषधी र चिकित्सकको ब्यवस्था सेभ द हर्टले गर्नेछ । गतबर्ष स्कुलका बिद्यार्थीहरु बाहेक करिब २ हजार जनाले शिविरबाट सेवा लिएकोले यसपटक पनि सोही अनुपातमा मुटु जाँच गराउने अनुमान गरिएको । क्लबले गएको बर्षसम्ममा क्लबले आयोजना गरेको शिविरमार्फत अहिलेसम्म करिब ५० हजार बढीसेवा लिएको पनि पत्रकार सम्मेलनमा जानकारी गराइएको थियो
