गोरखा, ११ कार्तिक । जिल्ला प्रशासन कार्यालय गोरखाले मर्यादिन भएर ब्यवस्थित रुपमा चाडपर्व मनाउन सबैलाई आग्रह गरेको छ । कार्यालयका सहायक प्रमुख जिल्ला अधिकारी चित्राङ्गत बरालले सूचना निकाले चाडपर्वको समयमा शान्ति सुरक्षामा असर पर्ने गरी सार्वजनिक ठाउँमा होहल्ला तथा झैझगडा गर्ने, सामाजिक जनजीवन, मर्यादा र शान्ति खलल गर्ने काम नगर्न आग्रह गरीएको हो ।
बरालले जारी गरेको सूचनमा जिल्लाको समग्र शान्ति सुरक्षाको अवस्थालाई मध्यनजर गरी देउसी भैलो, नाचगान लगायतका साँस्कृतिक क्रियाकलापहरु बिहान ७ बजेदेखी राती ९ बजेसम्म गर्न भनेको छ ।
कानून विपरीतका जुवातास, लङ्गुरबुर्जा खेल्ने÷खेलाउने, भईचँम्पा, पटका, आतिसबाजी जस्ता विपद् जोखिम निम्त्याउने तथा वातावरण प्रदुषण हुने विस्फोटक पदार्थहरुको आयात, ओसारपसार, बिक्री वितरण तथा प्रयोग नगर्न समेत सूचनामा भनिएको छ ।
शुक्रबार जारी गरेको सूचनामा अखाद्य रंग मिलाइएका मिठाई, झिलाङ्गे रोटी, जस्ता अस्वस्थ्य र गुणस्तरहीन खाद्य बस्नु बिक्री वितरण भन्दै म्याद गुज्रेका भाईमसाल, प्लास्टिक जन्य फूलमालाको प्रयोगमा समेत प्रतिबन्ध लगाएको छ ।
त्यस बाहेक पनि चाडपर्वको मौका छोपी ब्यवसाय दर्ता नगरी फुटपाथमा ब्यापार ब्यवसाय नगर्न नगराउन समेत भनेको छ । यदी कानुनविपरित कोहीकसैले कुनै गतिविधि गरेमा प्रहरीलाई खबर गर्नसमेत स्थानीयलाई अनुरोध गरेको छ ।
