काठमाण्डौ ६, कात्तिक । प्रहरीलाई गोली हान्न खोज्ने एक जना भारतीय नागरिकलाई प्रहरीले पक्राउ गरेको छ । प्रहरीले गोली हानेर पक्राउ गरेको हो । बुधबार दिउँसो साढे ३ बजे सिम्रौनगढ नगरपालिका वडा नम्बर– ९ सानो बंकुलमा ड्युटिमा रहेका प्रहरीमाथि पेस्तोल हान्न खोज्ने भारतीय नागरिक २८ वर्षका बृजकिशोर कुशवाहलाई गोली हानेर घाइते बनाएपछि पक्राउ गरेको हो ।
भारतबाट नेपालतर्फ आउँदै गरेका कुशवाहमाथि शंका लागि रोक्न खोज्दा प्रहरीमाथि नै उनले पेस्तोल हानेका थिए । तर उनको पेस्तोल पड्किएन । प्रहरीले ३०३ राइफलबाट १ राउण्ड फायर गर्दा बाँया पाखुरामामा गोली लागेर घाइते बनेका कुशवाहालाई नियन्त्रणमा लिइएको बाराका प्रहरी नायब उपरीक्षक गौतम मिश्रले जानकारी दिनुभयो ।
कुशवाहाको अवस्था सामान्य रहेको र उनको साथबाट पेस्तोल र त्यसमा लोड भएको ४ राउण्ड गोली बरामद भएको प्रहरीले जनाएको छ ।
