काठमाण्डौ, १० माघ । कास्कीका एन्फा अध्यक्ष मिलन गुरुङमाथि कुटपिट गरेको अभियोगमा पक्राउ परेका गण्डकी प्रदेशका सांसद राजीव गुरुङ दीपक मनाङेलाई अनुसन्धानका लागि जिल्ला प्रशासन कार्यालय कास्कीले दुई दिन म्याद थपेको छ ।
म्याद थपिएपछि प्रशासनबाट बाहिरिँदै मनाङेले ठगलाई कारबाहीको दायरामा ल्याउन आफू सफल भएको प्रतिक्रिया दिनुभएको छ । ‘त्यही ठगीको विरुद्ध मैले झापड हानेको हुँ । अहिले मिलनलाई पनि पक्राउ गरेको सुनेपछि खुसी लागेको छ, मनाङेको प्रतिक्रिया थियो ।
यसैबीच, बैंकिङ कसुर अभियोगमा एन्फा कास्कीका अध्यक्ष मिलन गुरुङ पक्राउ परेका छन् । पोखराको न्युरोडबाट गुरुङलाई पक्राउ गरिएको प्रहरीले जनाएको छ । गुरुङ् बिरुद्ध पोखराको लेकसाइडस्थित ॐ गौरा जोस्टेल होटलका सञ्चालक हरिभक्त आचार्यले प्रहरीमा ठगी मुद्दा दर्ता गराएका थिए ।
प्रहरीले सांसद राजीव गुरुङ अर्थात दीपक मनाङेले खेल व्यवस्थापन राम्रो नगरेको भन्दै मंगलबार मिलनलाई कुटपिट गरेको आरोपमा प्रक्राउ गरेको हो ।
