गोरखा १९, भदौ । गोरखामा शुक्रबार एकैदिन १६ जनामा कोरोना संक्रमणको पुष्टी भएको छ । गण्डकी प्रदेश क्षयरोग उपचार केन्द्रमा गरिएको स्वांब परीक्षणका क्रममा गोरखा नगरपालिका भित्रका १४ जना, अजिरकोट गाउँपालिकाका १ जना र शहिद लखन गाउँपालिकाका १ जनामा कोरोना संक्रमण पुष्टी भएको गण्डकी प्रदेश स्वास्थ्य निर्देशनालयले जनाएको छ । शुक्रबार संक्रमण भेटिएकाहरुमा ७ जना पुरुष र ९ जना महिला रहेका छन् ।
प्रदेश जनस्वास्थ्य प्रयोगशाला पोखराबाट संक्रमण पुष्टी भएकाहरुमा गोरखा नगरपालिका १३ का ९ महिला र ५ पुरुष सहित १४ जना, अजिरकोट र शहिद लखन गाउँपालिकामा १/१ जना पुरुष रहेका छन् । अजिरकोट गाउँपालिकाका संक्रमित पुरुष भारतबाट आई क्वोन्टिनमा बस्दै आएका व्यक्ति भएको स्वास्थ्य कार्यालय गोरखाका सूचना अधिकारी राजुरमण न्यौपानले जानकारी दिनुभयो ।
गोरखा नगरपालिका र शहिद लखन गाउँपालिकाका अन्य सबैजना कन्ट्याक ट्रेसिङ मार्फत स्वाब संकलन गरिएका व्यक्तिहरु रहेको पाइएको छ । सबैलाई गोरखा सदरमुकाममा रहेको आइसोलेसन कक्षमा ल्याउने तयारी भई रहेको उहाँले जानकारी दिनुभयो ।
