गोरखा, २५ असार ः गोरखा नगरपालिका वडा नम्बर–३ स्थित होल्सिङमा निर्माणाधीन श्री शिव पाञ्चायन मन्दिर परिसरमा विहिबार विशेष ’धार्मिक वृक्षारोपण कार्यक्रम’ सम्पन्न भएको छ । श्री शिव पाञ्चायन मन्दिर निर्माण मूल समिति, गँगटे सामुदायिक वन उपभोक्ता समूह, होल्सिङ टोल विकास संस्था र मनकामना महिला समूह गोरखाको संयुक्त आयोजनामा बृक्षारोपण गरिएको मन्दिर निर्माण समितिका सचिव विष्णुहरी अर्यालले जानकारी दिनुभयो ।
मन्दिर वरपरको वातावरणलाई स्वच्छ, हरियाली र धार्मिक सहिष्णुता अनुकूल बनाउने उद्देश्यका साथ बृक्षारोपण गरिएको हो । मन्दिर परिसरमा कल्की फूल, विरेन्द्र फूल, रुद्राक्ष लगायतका विभिन्न प्रजातिका बोट विरुवा लगाइएको छ । यसबाट मन्दिर परिषर्को धार्मिक र पर्यावरणीय वातावरणलाई थप स्वच्छ र मनमोहक बनाउने विश्वास लिइएको सचिव अर्यालको भनाई छ ।
डिभिजन वन कार्यालय गोरखाले बृक्षारोपणका लागि बिभिन्न जातका बोटविरुवाको बेर्ना उपलब्ध गराएको हो । गोरखा नगरपालिका वडा नं ३ का वडाध्यक्ष चुलबहादुर कुँवरको प्रमुख आतिथ्यतामा भएको कार्यक्रममा होल्सिङ टोल विकास संस्थाका सदस्यहरु मनकामना महिला समूहका सदस्यहरू, छिमेकी टोल विकास संस्थाका प्रतिनिधिहरू तथा साविक नारेश्वर–४ निवासी समाजसेवीलगायतको सहभागिता रहेको थियो । श्री शिव पाञ्चायन मन्दिर निर्माण मूल समितिका अध्यक्ष लेखप्रसाद अर्यालको अध्यक्षता कार्यक्रम सम्पन्न भएको हो ।
