गोरखा, २८ फागुन । फागुन २१ सम्पन्न प्रतिनिधिसभा निर्वाचनमा गोरखा जिल्लाको दुवै क्षेत्रको समानुपातिक तर्फको मतगणना सम्पन्न भएको छ । मुख्य निर्वाचन अधिकृतको कार्यालयका अनुसार क्षेत्र नम्बर १ र २ मा प्रत्यक्ष तर्फको अन्तिम नतिजा सार्वजनिक भइसकेपछि समानुपातिक मतपत्रको गणना सुरु गरिएको थियो ।
समानुपातिकको अन्तिम परिणाममा सार्वजनिक हुदा राष्ट्रिय स्वतन्त्र पार्टीले वर्चश्व कायम गरेको मुख्य निर्वाचन अधिकृत विण्णु प्रसाद गौतमले जानकारी दिनुभयो । गोरखा क्षेत्र नम्बर १ मा १ लाख २१ हजार ५ सय १६ मतदाता रहेको ठाउँमा ६४ हजार ३४९ मत खसेकोमा १ हजार ६ सय ७७ मत बदर हुदा ६२ हजार ७ सय १२ मत मात्र सदर भएको थियो ।
जसमध्ये रास्वपाले ३० हजार ८४८ मत पाएको छ भने दोस्रो स्थानमा रहेको नेपाली काँग्रेसले १४ हजार १ सय ६९ मत र तेस्रो स्थानमा रहेको नेपाल कम्यूनिष्ट पार्टीले १० हजार ७०१ मत र चौथो स्थानमा रहेको नेकपा एमालेले ३ हजार ७ सय ७९ मत पाएको मुख्य निर्वाचन कार्यालय गोरखाले जनाएको छ ।
उता क्षेत्र नम्बर २ मा १ लाख ८ हजार ५ सय ३३ जना मतदाता रहेकोमा ५७ हजार ९ सय २४ मत खसेको र २ हजार ५ सय ९९ मत बदर हुदा ५५ हजार ३ सय २५ मत सदर भएको थियो ।
जसमध्य राष्ट्रिय स्वतन्त्र पार्टीले २७ हजार ७०४ मत पाएको छ भने दोस्रो स्थानमा नेपाली काँग्रेसले १० हजार ३सय ४७ मत, तेस्रोमा नेपाल कम्युनिष्ट पार्टीले १० हजार २ सय ५२ मत र चौथो स्थानमा रहेको नेकपा एमालेले २ हजार ९ सय ४१ मत प्राप्त गरेको मुख्य निर्वाचन कार्यालयले जानकारी दिएको छ ।
