एजेन्सी १८, बैशाख ।अमेरिकी राष्ट्रपति डोनल्ड ट्रम्पले समाचार एजेन्सी रोयटर्सलाई बुधबार दिएको अन्तर्वार्तामा चीनले आफुलाई दोस्रोपटक राष्ट्रपति बनेको हेर्न नचाहेको आरोप लगाउनु भएको छ । ट्रम्पले कोरोनाभाइरसको महामारीलाई चीनले जसरी सम्हालिरहेको छ यो त्यसैको प्रमाण भएको जिकिर गरेका छन् ।
ट्रम्पले भन्नुभयो, ‘नोभेम्बरमा हुने चुनावमा चीनले मलाई रोक्नका लागि जे पनि गर्नेछ ।’ ट्रम्पले कोरोनाभाइरसको विश्वव्यापी महामारीका लागि चीनमाथि लगातार आरोप लगाउँदै आउनु भएको छ । अमेरिकामा कोरोनाभाइरसको संक्रमणका कारण हालसम्म ६१ हजार बढीको मृत्यु भइसकेको छ । यसका साथै अर्थव्यवस्था धरासयी बनेको छ भने बेरोजगारी ऐतिहासिक रुपमा बढेको छ ।
कोरोनाभाइरसको विध्वंशमाथि ट्रम्पमाथि प्रश्न उठिरहेको छ । उहाँलाई समय हुँदा नै सावधानी नअपनाएको आरोप लाग्ने गरेको छ । यता ट्रम्पले भने कोरोनाभाइरसको विषयमा चीन नै थप सक्रिय हुनुपर्दथ्यो भन्दै आउनु भएको छ । अन्तरवार्ताको क्रममा ट्रम्पलाई पत्रकारले चीनमाथि थप ट्यारिफ लगाउनुहुन्छ भन्ने प्रश्न गर्दा ट्रम्पले , ‘यस्ता थुप्रै कुरा छन् जुन म गर्नसक्छु भन्नुभयो ।’
उहाँले थपे, ‘के गर्न सकिन्छ, त्यो हामी हेरिरहेका छौं ।
चिनियाँ अधिकारी लगातार आफ्नो छवि सुधार्न कोसिस गरिरहेका छन् र उनीहरु यो मामलामा नितान्त निर्दोष छन् । उनीहरु यसका लागि पिआरको सहारा लिइरहेका छन् । चीनले मलाई रोक्न र राष्ट्रपतिको रेसमा पछाडि पार्नका लागि जे पनि गर्नेछ । चीन डेमोक्रेटिक पार्टीका जो बाइडन राष्ट्रपति बनून् भन्ने चाहन्छ ।’
पछिल्ला दिनमा कोरोनाभाइरसको महामारीको विषयमा अमेरिका र चीनबीच शीतयुद्ध चलिरहेको छ । ट्रम्पले कोरोनाभाइरसलाई चिनियाँ भाइरस भन्ने गर्नुभएको छ भने चीनले यसमाथि आपत्ति जनाउँदै आएको छ ।
स्रोतः रोयटर्स
