गोरखा, १४ चैत । उत्तरी गोरखामा आज बिहान भिरबाट लडेर एकजना पथ प्रदशकको मृत्यु भएको छ । मृत्यु हुनेमा सोलुखुम्बु जिल्ला, सोताङ गाउँपालिका–४ घर भएका ५४ बर्षिय सार्की शेर्पा भएको जिल्ला प्रहरी कार्यालय गोरखाका प्रहरी नायब उपरीक्षक एवं सूचना अधिकारी (डिएसपी) ईन्द्रप्रसाद सुवेदीले जानकारी दिनुभयो ।
अमेरिकी नागरिक लिएर मनासलु पद यात्रामा निस्किएका शेर्पाको धार्चे गाउँपालिका–३, खोर्लाबेशीस्थित बुढीगण्डकी नदी किनारमा लडेर मृत्यु भएको सूचना अधिकारी सुवेदीले बताउनुभयो ।
बिहान ९ बजे हिडीरहेका शेर्पा अचानक लड्न पुग्दा उहाँको टाउकोमा गम्भीर चोट लागेको थियो । घाईते शेर्पालाई स्थानीय धार्चे आधारभूत अस्पतालमा उपचारको क्रममा बिहान ९ः५० बजे चिकित्सकले मृत घोषित गरेको डिएसपी सुवेदीले जानकारी दिनुभयो ।
ईन्फो नेपाल ट्रेकिङ एजेन्सीमार्फत आएका शेर्पाको शव अहिले धार्चे आधारभुत अस्पतालमा राखिएको गोरखा प्रहरीले जानकारी दिएको छ ।
घटनास्थलमा प्रहरी चौकी माछाखोलाबाट प्रहरी खटिएको र अनुसन्धान भइरहेको छ ।
