काठमाडौं,६ माघ । इजरायलका प्रधानमन्त्री बेन्जामिन नेतन्याहुले युद्धविराम अस्थायी भएको भन्दै हमासविरुद्ध फेरि युद्ध गर्न तयार रहेको बताएका छन् ।
पहिलो चरणको युद्धविराम सुरु हुनुअघि टेलिभिजनमार्फत् देशबासीलाई सम्बोधन गर्दै प्रधानमन्त्री नेतन्याहुले दोस्रो चरणको युद्धविराम सफल नभएमा फेरि युद्ध सुरु गर्ने चेतावनी दिएका हुन् । उनले हमासविरुद्ध गाजा क्षेत्रमा आक्रमण गर्ने अधिकार इजरायललाई रहेको दाबी गरेका छन् ।
१५ महिना लामो युद्धपछि सन् २०२५ जनवरी १५ मा इजरायल र हमासबीच युद्धविराम सहमति भएको थियो । युद्धविराम तीन चरणमा हुने छ । पहिलो चरण आज १९ जनवरीदेखि १ मार्चसम्म हुने छ ।
पहिलो चरणमा इजरायलको जेलमा बन्द प्यालेस्टिनी रिहा हुनेछन् । त्यसको बदलामा ३३ इजरायली बन्धक रिहा हुनेछन् । इजरायली सेना गाजा क्षेत्रबाट सात सय मिटर पछि हट्ने छन् ।
पहिलो चरणको युद्धविराम सफल भएमा दोस्रो चरणको युद्धविराम सुरु हुने छ । यस चरणमा दुवैपक्षबाट कुनै पनि आक्रमण नगर्ने, राहत सामग्री आपूर्ति गर्ने र बन्दी रिहाइ जारी राख्ने सहमति छ । तेस्रो चरणमा भने इजरायलको आक्रमणबाट ध्वस्त गाजा क्षेत्रको पुनर्निर्माण गरिने छ । युद्धविरामको क्रममा इजरायलले १ हजारभन्दा बढी प्यालेस्टिनीलाई रिहा गर्ने जनाइएको छ ।
युद्धविराम कार्यान्वयनमा आउनुअघिको टेलिभिजन सम्बोधनको क्रममा नेतन्याहुले अमेरिकी राष्ट्रपटि डोनाल्ड ट्रम्प समेत इजरायलको पक्षमा रहेको जिकिर गर्नुभयो ।
उहाँले हमासका नेता याह्या सिनवार मारिएको लगायतका युद्ध सफलताका विवरण सुनाउनुभएको थियो । उहाँले भन्नुभयो, ‘हामीले मध्यपूर्वमा परिवर्तन ल्याइदिएका छौं । हमास अब पूरै एक्लिएको छ ।’
उहाँले युद्धविराम सम्झौताको उल्लंघन कुनै पनि हालतमा सैह्य नहुने समेत बताउनुभयो । तर बुधबार युद्धविराम सम्झौताको घोषणा भएपछि पनि इजरायलले आक्रमण गर्दा १२० जना मारिएको हमासले जनाएको छ ।
