गोखरा, २१ मंसिर । नेपाल कम्युनिष्ट पार्टी (माओवादी केन्द्र) गोरखाले जिल्ला भित्रका सवै पालिकामा तेस्रो सम्मेलनको तयारी थालेको छ । स्थानीय तहको उपनिर्वाचनबाट सफलता हात पारेको माओवादी केन्द्रले सवैपालिका उत्साहका साथ सम्मेलनको तयारी सुरु गरेको पार्टीका जिल्ला सचिव अंकुर तिमिल्सना ‘आयाम’ ले जानकारी दिनुभयो ।
पालिका पार्टीलाई थप चलायमान बनाउँदै जनता नेता कार्यकर्तामा उत्साह बढाउनका लागि नयाँ नेतृत्व चयन गर्न पालिकास्तरीय सम्मेलनको तयारी थालिएको उहाँको भनाई छ । पार्टीले अहिलेसम्म सवै पालिकाको सम्मेलनको मितिसमेत ठोस गरिसकेको छ ।
जस अनुसार गोरखा नगरपालिका, पालुङटार नगरपालिका, आरुघाट गाउँपालिका, बारपाक सुलिकोट गाउँपालिका, गण्डकी गाउँपालिका र सिरानचोक गाउँपालिकामा मंसिर २९ गते, भीमसेन थापा गाउँपालिका र अजिरकोट गाउँपालिकामा मंसिर २८ गते सम्मेलन गर्न लागिएको सचिव तिमल्सिनाले बताउनुभयो ।
त्यस्तै शहिद लखन गाउँपालिका मंसिर २६ गते र धार्चे गाउँपालिकामा मंसिर ३० गते सम्मेलन लागिएको उहाँको भनाई छ । जिल्ला भित्रका सवै पालिका कमिटीको बैठक बसेर सम्मेलनको पार्टीले सम्मेलनको मिति तय गरेको माओवादीले जनाएको छ ।
सम्मेलनकै अवसरमा सवै पालिकाहरुमा सरकार बिरुद्ध खबरदारी सभा गर्ने तयारी समेत माओवादी केन्द्रले गरेको उहाँले बताउनुभयो । खबरदारी सभामा सरकारका गलत क्रियाकलापको भण्डाफोर गर्दै जनजागरण अभियानका रुपमा अघि बढाउने कार्यक्रम रहेको उहाँले बताउनुभएको छ ।
