गोरखा, २९ भदौ । गोरखामा आज दुर्घटनामा परी घाईते भएका नेपाली सेनाका लेस नायकको मृत्यु भएको छ । गोरखा नगरपालिका दलभञ्ज्याङमा शनिवार दिउँसो ट्रिपर र मोटरसाइकल ठोक्किँदा मोटरसाइकलमा सवार नेपाली सेनाका लेस नायकको मृत्यु भएको हो । अर्का एकजना गम्भिर घाइते भएका छन् ।
आज दिउँसो साढे ४ वजेतिर भएको दुर्घटनामा गम्भिर घाइते इलाम देऊमाई गाऊँपालिका २ घर भएका २५ वर्षका सुरेन्द्र राईको उपचारका क्रममा गोरखा अस्पतालमा मृत्यु जिल्ला प्रहरी कार्यलय गोरखाका प्रहरी नायब उपरिक्षक एबम् सुचना अधिकारी डिएसपी रमेशकुमार श्रेष्ठले जानकारी दिनुभयो ।
उहाँका अनुसार दुर्घटनामा गम्भिर घाइते हुनुभएका संखुवासभा नगरपालिका ३ खापाङ घर भएका २४ वर्षका जनम राईलाई थप उपचारका लागि काठमाण्डौं लगिएको छ । दुबैजना गोरखास्थित नेपाली सेनाको रिपूमर्दन गणमा कार्यरत रहेका जिल्ला प्रहरी कार्यालयका डिएसपी श्रेष्ठले बताउनुभयो ।
गोरखा बजारबाट आँबुखैरेनीतर्फ गैरहेको ग १ क ५६५४ नम्वरको ट्रिपर र विपरित दिशाबाट आइरहेको बा ७० प २८७१ नम्वरको मोटरसाइकल ठोक्किएर दुर्घटना भएको जिल्ला ट्राफिक प्रहरी कार्यालयका प्रमुख बासुदेव पाठकले बताउनुभयो । ट्रिपर र चालक अजिरकोट घर भएका चन्द्रबहादुर परियारलाई गोरखा प्रहरीले नियन्त्रणमा लिएको छ ।
