काठमाडौं २६,भदौ । सरकारले सार्वजनिक बिदाको दिन पनि सरकारी अस्पतालले बहिरङ्ग सेवा दिनुपर्ने गरी निर्णय गरेपछि नागरिक खुसी भएका छन् । तर स्वास्थ्यकर्मी र चिकित्सकहरूमा भने असन्तुष्टि बढेको छ । ललितपुरको एउटा निजी कार्यालयमा कार्यरत कपिलवस्तुकी कमला आचार्यले नियमित स्वास्थ्य परीक्षण गराउन कार्यालयमा बिदा लिनुपर्ने अवस्था रहेकामा अब सजिलो हुने भएपछि खुसी लागेको बताउनुभयो ।
आर्थिक सर्वेक्षण २०८०÷८१ अनुसार गत आर्थिक वर्षको फागुनसम्म सरकारी तथा निजी स्वास्थ्य संस्थाबाट ४ करोड २६ लाख नागरिकले बहिरङ्ग सेवा लिएका छन् ।
कुल सेवामध्ये बहिरङ्ग सेवाको अंश सबैभन्दा धेरै ९२ दशमलव ६ प्रतिशत रहेको सर्वेक्षणले देखाएको छ । यो तथ्याङ्क सार्वजनिक बिदाको दिन बाहेकको हो । अब सार्वजनिक बिदाको दिन पनि बहिरङ्ग सेवा खुल्ने भएपछि बाहिर जिल्लाबाट उपचार कै लागि काठमाडौं उपत्यकालगायतका सहरमा पुगेकाहरूलाई धेरै राहत मिल्ने ललितपुरका केशव महर्जनले बताउनुभयो । स्वास्थ्य तथा जनसङ्ख्या मन्त्रालयले भने दशैँ तिहारलगायत सबै सार्वजनिक बिदाको दिन नभइ केही पर्व, जात्रा र अन्य सार्वजनिक बिदाको दिन मात्रै बहिरङ्ग सेवा खोल्ने निर्णय भएको बताएको छ ।
त्यसै अनुसार सबै सरकारी अस्पताललाई परिपत्र गरिएको प्रवक्ता डा. प्रकाश बुढाथोकीले बताउनुभयो । मन्त्रालयले यी बिदाको दिन काम गर्ने चिकित्सक र स्वास्थ्यकर्मीलाई सट्टा बिदा वा त्यस दिन वापतको पारिश्रमिक दिने दाबी गरेको छ । यद्यपी नेपाल चिकित्सक सङ्घले भने सरकारको यो निर्णय तत्काल मान्न नसकिने जनाएको छ ।
