गोरखा, २४ चैत । जिल्ला प्रहरी कार्यालय गोरखाको बिशेष सुरक्षामा गएको दश महिनादेखि प्र्रहरी कार्यालयमा राखिएको टल्कने ढुङगा ‘क्वार्ज क्रिष्टल’ शुक्रबार ऐतिहासिक गोरखा दरबारमा प्रतिस्थापन गरिएको छ ।
दरबार भित्र रहेको तत्कालिन राजा पृथ्वीनारायण शाहको गद्दी कोठामा विशेष सुरक्षाका साथ ‘क्वार्ज क्रिष्टल’ राखिएकोे गोरखा नगरपालिकाका नगरप्रमुख कृष्णबहादुर रानामगरले जानकारी दिनुभयो । ‘‘क्वार्ज क्रिष्टल विशेष सुरक्षायुक्त सिसाको बाकस निर्माण राखिएको छ, उहाँले भन्नुभयो, ‘‘उक्त वाकस टेवलमाथि राख्ने र चौविसैघण्टा निगरानीका लागि सिसी क्यामेरा समेत जडान गरिएको छ ।’’ नगरप्रमुख रानामगरले क्वार्ज क्रिष्टल राख्न लागिएको गद्दी कक्षमा बिशेष बत्तीको व्यवस्था गरिएको छ । ‘‘गद्दी कोठामा राखिएको क्वार्ज क्रिष्टल दरबारमा पुग्ने सवै दर्शनाथीहरु, आन्तरिक तथा बाह्य पर्यटकहरुले भ्यालबाट अवलोकन गर्नसक्ने व्यवस्था मिलाइएको छ ।
प्रधानमन्त्री पुष्पकमल दाहाल ‘प्रचण्ड’ ले आज एक कार्यक्रमका बिच क्वार्ज क्रिष्टल दरबारमा पुनस्थापन गनुभएको हो । महंगो मूल्यमा किनवेच हुन लागको गोप्य सूचनाका आधारमा गएको असार १४ गते गोरखा नगरपालिका–७ सतिपिपलस्थित राममाया शाहीको घरबाट प्रहरीले उक्त क्वार्ज क्रिष्टल बरामद् गरेको थियो । उक्त ‘क्वार्ज क्रिष्टल’ को भूगर्भविद्हरुको टोलीले गोरखामा नै आएर दुईदिन लगाएर परीक्षण गरेका थिए ।
परीक्षणबाट उक्त ढुङ्गा महत्वपूर्ण र बहुमुल्य रत्नपत्थर (क्वार्ज क्रिष्टल) भएको र संसारभरका धातुलाई कडापनका आधारमा १० भागमा वर्गीकरण गर्ने गरिएकोमा बरामद गरिएको ढुङ्गा ७ औं नम्बरमा पर्ने भूगर्भविद्ले जानकारी गराएका थिए । उक्त ढुङ्गा ५२ किलो ३ सय ३० ग्राम रहेको रहेको छ ।
