पोखरा, ९ पुस । राष्ट्रिय स्वतन्त्र पार्टी रास्वपाका सभापति रवि लामिछानेलाई मकैको खोया प्रहार गरेको आरोपमा पक्राउ परेका सन्तोष रानाभाटलाई १० दिन हिरासतमा राख्न प्रशासनले अनुमति दिएको छ ।
सार्वजनिक शान्ति भंग गरेको कसुरमा अनुसन्धान गर्न जिल्ला प्रशासन कार्यालयले अनुमति दिएको कास्की प्रहरी प्रवक्ता डिएसपी श्रवणकुमार विकले जानकारी दिनुभयो । उहाँका अनुसार १० दिनभित्र अनुसन्धान गरेर जिल्ला प्रशासन कार्यालयमा मुद्दा दर्ता गर्ने प्रहरीको तयारी छ । रास्वपाले शनिबार पोखरामा आयोजना गरेको सभामा सभापति लामिछानेले बोल्दै गर्दा रानाभाटले खोया प्रहार गरेका थिए। खोया प्रहार भएपछि उनलाई प्रहरीले नियन्त्रणमा लिएको थियो ।
रानाभाटले भने लामिछानेलाई लक्षित गरेर खोया प्रहार गरेको अस्वीकार गरेका छन् । प्रहरीले लिएको प्रारम्भिक बयानमा उनले आफू लड्दा उछिट्टिएर खोया स्टेजमा पुगेको बताएका छन् । रानाभाट लमजुङको राइनास नगरपालिका वडा नम्बर ८ भाटगाउँका हुन्। वडाध्यक्ष कृष्णबहादुर रानाभाटका अनुसार सन्तोषका बाबु भारत गएर बेपत्ता छन् भने उनकी आमाले अर्को विवाह गरेर गएकी थिइन् ।
खोया प्रहार भएपछि सभापति लामिछानेले रानाभाटलाई केही नगरी घर पुर्याइदिन स्टेजबाटै प्रहरीलाई आग्रह गरेका थिए । प्रहरीले भने परिचाालित वा योजनाबद्ध आक्रमण हो वा होइन भनेर बुझ्न हिरासतमा लिएर अनुसन्धान गरेको जनाएको छ ।
