गोरखा, २१ मंसिर । पटक पटक विवादमा मुछिदै आएका द्रव्यशाह बहुमुखी क्याम्पसका क्याम्पस प्रमुख रामचन्द्र दुवाडी फेरी विवादमा आएका छन् । क्याम्पसमा क्रियाशिल तीनवटा विद्यार्थी संगठन सहित स्वतन्त्र विद्यार्थी युनियन (स्ववियू) ले क्याम्पस प्रमुखले मनलाग्दी गर्ने गरेको भन्दै दुवाडीको कार्यकक्षमा तालावन्दी गरेपछि उहाँ विवादमा पर्नुभएको हो ।
विहिवार बिभिन्न विद्यार्थी संगठनहरुले क्याम्पस प्रमुख दुवाडीले सहमती अनुसारको काम नगरेको भन्दै गोरखा नगरपालिका–९ को लक्ष्मीबजारमा रहेको द्रब्यशाह बहुमुखी क्याम्पसको क्याम्पस प्रमुखको कार्यकक्षमा तालाबन्दी गरिदिएको हो ।स्वतन्त्र बिद्यार्थी युनियन, नेपाल बिद्यार्थी संघ, अखिल क्रान्तिकारी बिद्यार्थी संगठन र अनेरास्ववियु बिद्यार्थी संगठनले क्याम्पस प्रमुखको कार्यकक्षमा तालाबन्दी गरिदिएको हो ।
उनीहरुले प्रशासनको कमजोरी र वेथिती भएको सुधारकालागी पहल गर्दा पनि वेवास्ता गरेको भन्दै प्रमुखको कार्यकक्षमा तालाबन्दी गरिदिएको स्वतन्त्र बिद्यार्थी युनियनका अध्यक्ष सौनक घिमिरेले बताउनुभयो ।
केही समय यता प्रशासनका कर्मचरी तथा लेक्चरको दैनिक उपस्थिती नभएको, कुनै पनि कार्यक्रममा स्वतन्त्र बिद्यार्थी युनियन तथा अन्य विद्यार्थी संघ/संगठनलाई सहभागी तथा कार्यक्रम गर्दा छलफल नगरेको बिषयमा हामीले पटक पटक क्याम्पस प्रमुखलाई जानकारी गराएको भएता पनि स्वईच्छाचारी ढंगले अगाडी बढेको कारण बाध्य भएर तालाबन्दी गर्नुपरेको नेपाल विद्यार्थी सघंका द्रब्यशाह ईकाइका अध्यक्ष प्रमोदजंङ कुवरले बताउनुभयो ।
उनका अनुसार विद्यार्थीहरुको पुस्तक, क्याम्पसको सरसफाई तथा बिद्यार्थी बिरामी पर्दा तत्कालै दिन सकिने सामान्य औषधी समेत पनि क्याम्पसले दिन नसक्ने भए पछि सबैसंघ संगठन संग छलफल गरेर तालाबन्दी गरिएको उहाँको भनाई छ ।
क्याम्पस प्रमुख रामचन्द्र दुवाडी भने तालाबन्दी पछी मात्र क्याम्पसमा पुगेका थिए। म कामको शिलशिलामा राजधानी थिए । यहाँ तालाबन्दी भएछ । बिद्यार्थीहरुको माग के हो हामी आजैदेखी छलफलमा जुट्छौ ।’
यस अघि पदिय मर्यादा भुलेर सामाजिक सञ्जालमा जनयुद्धको विषयमा जथाभावी लेखेपछि उहाँ बिरुद्ध पनि विद्यार्थीहरुले चर्को विरोध गरेका थिए । उक्त विवाद लामोसमयसम्म चर्किएपछि जिल्ला प्रहरी कार्यालय गोरखामा वसेर दुवाडीले आत्माआलोचना गर्नुपरेको थियो ।
