गोरखा, १३ कात्तिक । लेक लागेर बिरामी परेका दुई जना विदेशी पर्यटकको उद्धारमा समस्या भएको छ । उत्तरी गोरखाको चुमनुब्री गाउँपालिका–६, रिप्चेत स्थित लुम्जेन गुम्बामा पुगेपछि बिरामी परेका बिदेशी पर्यटकको उद्धारमा कठिनाइ भएको गोरखाका प्रमुख जिल्ला अधिकारी दिनेशसागर भुसालले जानकारी दिनुभयो ।
लेक लागेर बिरामी पर्नेहरुमा स्वीजरल्याण्ड नागरिक सोल्भे सोफिया सिह्यूल र अमेरिकी नागरिक इरिक कोनेल ओलरज रहेका छन् । उनिहरुको उद्धारका लागि आवश्यक सवै प्रक्रिया पुरा भएपनि हेलिकप्टर उडानमा समस्या परेपछि उद्धार गर्न कठिनाई भएको उहाँले बताउनुभयो ।
बिरामीहरुको उद्धारका लागि आइतवार प्रयास गरिएको भएपनि असफल भएको थियो । प्रमुख जिल्ला अधिकारी भुसालले गृहमन्त्रालयले हेलिकप्टर उडानको अनुमति दिएको भएपनि मौसममा खराबीका कारण हेलिकप्टर उडाउन समस्या भएको हो ।
मन्त्रालयले अल्टिच्यूड एयरको हेलिकप्टर बिरामीहरुको उद्धार गर्ने अनुमति दिएको उहाँको भनाई छ । मौसममा सुधार आए आज दुवैजनाको उद्धार गरिने प्रजिअ भुसालले जानकारी दिनुभयो ।
