गोरखा,१९असोज । गोरखा नगरपालिका–८ का कृष्णबहादुर केसीले कुखुरा पालनबाट मनग्य आम्दानी गर्दै आउनु भएको छ । जागिरे जीवनबाट अबकास लिएपछि उहाँले भन्दै व्यवसायिक कुखुरा पालन पेशा अगाल्नु भएको पनि करिब ५ बर्ष भयो । अहिले कुखुरा पालनबाट के.सीले मासिक २ लाख ५० हजार भन्दाबढी आम्दानी गर्दै आउनु भएको छ ।
उहाँले अकलामाई पशुपन्छी तथा पोल्ट्री फर्म सञ्चालन गरी व्यवसायिक कुखुरा पालन गर्दै आउनु भएको हो । करिब ९४ लाख रुपैयाको लगानीमा ७ रोपनी क्षेत्रफल भएको आफ्नै जग्गामा खोर निर्माण गरेर केसीले लेयर्स जातको कुखुरा पालन गरेको उहाँले बताउनुभयो । राम्रो उत्पादन भएका बेला फर्मबाट दैनिक रुपमा ३६ हजार रुपैयासम्मको अण्डाको उत्पादन हुने गरेको केसीको भनाई छ ।
उहाँले ५÷५ हजार कुखुरा अटाउन सक्ने क्षमताका दुईवटा खोर निर्माण गरेर कुखुरा पालन गर्दै आएको छ । ‘एउटा खोरमा ५ हजार कुखुरा हालेपछि त्यसले झण्डै ५ महिनापछि अण्डा दिन थाल्छ, एक लटको कुखुराले करिब २ बर्षसम्म अण्डा दिन्छ, उहाँले भन्नुभयो, बजारमा उत्पादन पठाउन खाली नहोस् भनेर एउटा खोरको कुखुराले अण्डा दिन सुरु गरेको करिब ८ महिनापछि अर्को खोरमा पनि कुखुराको चल्ला हाल्न सुरु हुन्छ ।’
फर्मबाट उत्पादन भएको अण्डालाई साईजका आधारमा ग्रेडिङ गरेर बजारमा पठाउने गरेको उहाँले बताउनुभयो । ‘ठूलो साईज, मझौला साइज र सानो साइजको गरी तीन ग्रेडमा उत्पादित अण्डालाई छुट्याएर सोही अनुसार दररेट निर्धारण गरी बजारमा पठाउने गरिएको छ, उहाँले भन्नुभयो, ‘ उत्पादित अण्डा बजारमा सजिलै बिक्री हुन्छ ।’
फर्ममा आम्दानी र खर्चको हिसावमा मासिक २ लाख ५० हजारसम्म नाफा हुने उहाँले बताउनुभयो । ‘व्यवसायिक रुपमा काम गर्ने इच्छाशक्ति भए पैसा कमाउन बिदेश नै जानुपर्छ भन्ने छैन, उहाँले भन्नुभयो, गरेमा स्वदेशमा सवैथोक हुन्छ र सम्भव पनि छ ।’ अण्डा उत्पादन सुरु भएपछि दैनिक रुपमा कहिल्यै पनि पैसाको अभाव नहुने गरेको उहाँ बताउनुभयो ।
‘अण्डा उत्पादन हुन थालेपछि पैसा कमाउने पेशा भनेको यहीँ मात्र रहेछ भन्ने जस्तो लाग्छ, केसीले भन्नुभयो, बजारमा पुगेपछि पैसा आइहल्छ ।’ उहाँले कुखुरा पालन व्यवसाय सञ्चालनबाट परिवारका सदस्य सहित ७ जनालाई रोजगारी पनि दिदै आउनु भएको छ । केसीले कृषि बिकास बैंक गोरखा शाखाबाट ऋण लिएर कुखुरा पालन सुरु गरेको बताउनुभयो ।
