मनाङ, १७ साउन । हिमाली जिल्ला मनाङमा भुइँ बारुला (सिङ्गुस) खाँदा छ जना बिरामी परेका छन् । मङ्गलबार दिउँसो चामे गाउँपालिका–३ कोतोस्थित मनाङमा काम गर्ने छ जना मजदुरले सिङ्गुस पोलेर खाँदा बिरामी परेका हुन् ।
गोर्खाका सेते तामाङ, पहलमान थापा, दलबहादुर आले, गुन्जमान थापा, वनबहादुर आले, उदयपुरकी लीला तामाङ, धादिङका प्रेमबहादुर घले, बिरामी परेको जिल्ला प्रहरी कार्यालय मनाङले जनाएको छ ।
जिल्ला प्रहरी कार्यालय मनाङका प्रहरी नायब उपरीक्षक नवीनकुमार भण्डारीका अनुसार सिङ्गुस खाएका सात जनालाई लमजुङ जिल्ला अस्पतालमा उपचार भइरहेको छ । “सिङ्गुस खाएर रातिदेखि मुटु, छाती र सबै जीउ पोल्न थालेपछि उनीहरूलाई थप उपचारको लागि लमजुङ अस्पताल पठाइएको छ”, प्रहरी नायव उपरीक्षक भण्डारीले भन्नुभयो ।
उहाँका अनुसार सबै बिरामी अचेत अवस्थामा रहेका छन् । सिङ्गुस खाएर ३५ देखि ४८ उमेर समूहको रहेको उहाँले बताउनुभयो ।
