काठमाडौं, १६ साउन । नेकपा एमालेका सांसद टोपबहादुर रायमाझी निलम्बन भएको जानकारी आज संसद्लाई गराइने भएको छ । नेपालीलाई नक्कली भुटानी बनाएर शरणार्थी बनाउने प्रकरणमा रायमाझी असार १ गते पुर्पक्षका लागि थुनामा पठाइएका थिए । २०७९ को नियम २४८ को उपनियम ३ को व्यवस्थाअनुसार उनी त्यतिबेलै निलम्बित भए पनि आज संसद्लाई जानकारी गराइन लागिएको हो ।
त्यस्तै सभामुख देवराज घिमिरेले राष्ट्रपतिको कार्यालयबाट प्राप्त कार्यभार तोकिएको र विधेयक प्रमाणीकरण सम्बन्धी पत्रहरूको व्यहोरा पढेर सुनाउने आजको बैठकको सम्भावित कार्यसूची रहेको छ ।
त्यस्तै सभामुख घिमिरेले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार तोकिएको सम्बन्धी पत्रहरूको व्यहोरा पढेर सुनाउने कार्यसूची रहेको छ । आजकै बैठकमा कानून, न्याय तथा संसदीय मामिला मन्त्री धनराज गुरूङले बेपत्ता पारिएका व्यक्तिको छानविन, सत्य निरूपण तथा मेलमिलाप आयोगका पदाधिकारीको कार्यावधि थपको प्रस्ताव पनि गर्ने सम्भावित कार्यसूचीमा उल्लेख छ ।
शिक्षा विज्ञान तथा प्रविधि मन्त्री अशोककुमार राईले राष्ट्रिय सभामा उत्पत्ति भएको नेपाल विश्वविद्यालय विधेयक, २०८० लाई दफावार छलफलको लागि सम्बन्धित समितिमा पठाइयोस् भनेर आज बैठकमा प्रस्तुत गर्ने छन् ।
प्रतिनिधि सभाको बैठक आज दिउँसो १ बजेलाई बोलाइएको थियो । तर, एक घन्टा बित्न लाग्दा पनि अझै पनि सुरू भएको छैन ।
एमालेले आजको बैठक पनि अवरोधको तयारी गरेको छ । उसले सुन काण्डमा उच्चस्तरीय छानबिन समितिको माग राख्ने संसद् अवरोध गर्दै आइरहेको छ । आज पनि बैठकमा त्यही माग गर्ने र सरकार अनिच्छुक देखिए सदन अवरूद्ध गर्ने एमालेको तयारी छ ।
