गोरखा, ५ साउन । पूर्वप्रधानमन्त्री डा.बाबुराम भट्टराईले जिल्ला प्रहरी कार्यालय गोरखाले बरामद् गरी प्रहरी कार्यालयमा राखेको टल्कने ढुङ्गा ‘क्वार्ज क्रिस्टल’ गोरखा दरबार संग्राहलयमा राख्न उपयुक्त हुने बताउनु भएको छ ।
जिल्ला प्रहरी कार्यालय गोरखामा पुगेर बरामद् गरिएको क्वार्ज क्रिस्टलको आज अवलोकन गर्नुहुदैँ उहाँले अनुसन्धानका लागि बरामद गरिएको ‘क्वार्ज क्रिस्टल’ गोरखा दरबार संग्राहलयमा अवलोकनका लागि राख्नु उपयुक्त हुने बताउनु भएको हो ।
‘मैले त्रिभुवन विश्वविद्यालयका सम्बन्धित विषयविज्ञहरूबाट बुझे अनुसार यो अर्ध–बहुमूल्य पत्थर क्वार्ज क्रिस्टल हो, उहाँले भन्नुभयो, यसलाई अवलोकनका लागि गोरखा दरवार सङ्ग्राहलयमा राख्नु उपयुक्त हुन्छ ।’
पूर्वप्रधानमन्त्री डा.भट्टराईले क्वार्ज क्रिस्टल स्थानीय एक परिवारले पुस्तौदेखि धार्मिक आस्थाको रुपमा पुजा गर्दै आएको भएकाले सम्बन्धित परिवारको चित्त बुझाएर मात्र संङ्ग्राहलयमा राखिनुपर्नेमा समेत जोडदिनुभयो ।
‘पुस्तौंदेखि धार्मिक आस्थाको रूपमा स्थानीय परिवारले पूज्दै आएको हुँदा उहाँहरुकोे चित्त बुझाएर यसलाई सार्वजनिक अवलोकनका निम्ति गोरखा दरबार संग्रहालयमा राख्नु उपयुक्त हुन्छ, उहाँले भन्नुभयो, ‘त्यसका निम्ति स्थानीय सरकारले ध्यान देओस् ।’
डा. भट्टराईलाई जिल्ला प्रहरी कार्यालय गोरखाका प्रमुख प्रहरी उपरीक्षक (एसपी अनुपम श्रेष्ठले उक्त बरामद् गरिएको क्वार्ज क्रिस्टल अवलोकन गराउनु भएको थियो । यसअघि गोरखा जिल्ला भित्रका बिभिन्न धार्मिक तथा सामाजिक संस्थाहरुले पनि टल्किने ढुङगा गोरखाको पबित्र धार्मिकस्थल गोरखकाली मन्दिर वा गोरखनाथ भुमिमै राख्नुपर्ने भन्दै प्रमुख जिल्ला अधिकारीको ध्यानकर्षण गराएका थिए ।
गोरखा नगरपालिका–७, सतिपिपल स्थित एक घरबाट गएको असार १४ गते बरामद् गरिएको टल्कने ढुङ्गा अहिले जिल्ला प्रहरी कार्यालयमा राखिएको छ । उक्त टल्कने ढुङगा सो परिवारले बर्षौदेखि कुलायन देवताको रुपमा घरमा राखेर पुजा गर्दै आएको पाइएको छ ।
