काठमाडौं । कोरोना भाइरसको संक्रमणका कारण पर्यटन वर्ष सन् २०२० प्रभाबित हुने भएको छ । कोरोना भाईरसका कारण पर्यटन क्षेत्रमा तीन प्रतिशतसम्मको गिरावट आउने अनुमान गरिएको छ । संयुक्त राष्ट्रसंघीय विश्व पर्यटन संगठनले यस्तो अनुमान गरेको हो । सन् २०१९ मा विश्वभरका १ अर्ब ४६ करोड मानिस आफ्नो देशबाट अन्य देशमा भ्रमणको उद्देश्यले निस्किएको संगठनको तथ्यांकमा उल्लेख गरिएको छ । यसवर्ष कोरोनाका कारण विश्वभर करिव ४ करोड ३८ लाख पर्यटक कम हुने संगठनको अनुमान लगाएको छ ।
संगठनले यसअघि जनवरीको पहिलो साता गरेको प्रक्षेपणमा विश्वभर पर्यटक आगमनमा ३ देखि ४ प्रतिशतसम्मको वृद्धि हुने अनुमान गरेको थियो । पर्यटक आगमनमा हुने गिरावटले पर्यटनमा अुने आयसमेत घट्ने छ । अहिले संसारमा बढी घुमघाम गर्न निस्कनेमा शियाली धेरै रहेका छन । जसमा ठूलो जनसंख्या भएको चीन र भारत बढी रहेका छन।
नेपालमा कोरोना प्रभावबारे सरकारले कुनै अध्ययन पाईएको छैन । तर, सन् २०२० को पहिलो दुई महिनाको पर्यटकीय तथ्यांकलाई हेर्ने हो भने पनि करीव २ प्रतिशतको गिरावट आएको देखिन्छ। अझ मार्च महिनामा भने यो संख्या अझै घट्ने निश्चित देखिएको छ । मार्चमा अन्तर्राष्ट्रिय उडानमा समस्या शुरु भएका कारण पनि गिरावट आउने देखिन्छ ।
चीनबाट आउने पर्यटकमा ८० प्रतिशतको गिरावट आइसकेको छ । खाडी मुलुकतर्फको उडानसमेत प्रभावित भएकोले पर्यटक घट्ने देखिएको छ । नेपालमा पर्यटकीय मौसम शुरु भएको छ ।पर्वतारोहणको सिलसिलामा धेरै पर्यटक चैत–जेठसम्म नेपाल आउने भएता पनि कोरोना भाइरसका कारण यो सिजन प्रभावित हुने देखिएको छ । सरकारले ८ देशमा अनअराइभल भिसा बन्द गरिसकेको छ । यी मुलुक नेपालमा बढी पर्यटक आउनेमध्ये देशहरु हुन् ।
युरोप र अमेरिकी मुलुकमा पछिल्ला दिनमा कोरोनाका फैलिरहेको कारण आगामी दिनमा पर्यटन क्षेत्र अझ प्रभावित हुने चिन्ता पर्यटन व्यवसायीमा परेको छ ।
