गोरखा, १३ पुष । नेपाली कांग्रेसको गण्डकी प्रदेशसभा संसदीय दलको नेतामा गोरखाका सांसद सुरेन्द्रराज पाण्डे निर्वाचित हुनु भएको छ । आज कांग्रेस संसदीय दलको कार्यालय नदीपुरमा भएको मतदानमा भोजराज अर्याललाई १० मतले हराउँदै पाण्डे निर्वाचित हुनु भएको हो । सांसद पाण्डेले १८ मत प्राप्त गर्नु भएको छ भने अर्यालले ८ मत ल्याउनु भएको छ ।
कुल २७ मत मध्ये १ मत बदर भएको छ । पाण्डे कांग्रेस सभापति शेरबहादुर देउवा पक्ष र अर्याल शेखर कोइराला पक्षका हुुनुहुन्छ । निर्वाचित पाण्डे गोरखा क्षेत्र नम्बर २ (ख) बाट प्रदेशसभामा निर्वाचित हुनुभएको थियो । दलको नेतामा ४ जना आकांक्षी रहे पनि पाण्डे र अर्यालले मनोनयन दर्ता गराउनु भएको थियो ।
पाण्डेको प्रस्तावक विन्दुकुमार थापा र समर्थक डा. टकराज गुरुङ रहनु भएको थियो भने अर्यालको प्रस्तावक महेन्द्रध्वज जिसी र समर्थक पार्वती तामाङ रहनु भएको थियो । गण्डकी प्रदेशसभामा कांग्रेसका २७ जना सांसद छन् । केन्द्रमा सत्ता समीकरण बदलिएसँगै गण्डकीमा पनि कांग्रेसको सरकार नबन्ने निश्चित भइसकेको छ ।
