काठमाण्डौं,७ पुस। राष्ट्रिय खेलकुद परिषदको नेपाल शारीरिक सुगठन तथा फिट्नेस महासंघ तदर्थ समिति गठन गरेको छ । परिषदले २ वटा संघको रुपमा अस्तित्वमा रहेको बडिबिल्डिङमा सहमतिका आधारमा राजेशबाबु श्रेष्ठको संयोजकत्वमा तदर्थ समिति गठन गरेको हो ।
परिषदले नयाँ बनेको तदर्थ समितिलाई ३ महिनामित्र निर्वाचन गर्न निर्देशनसमेत दिएको छ । राष्ट्रिय खेलकुद विकास ऐनमा १ खेलको लागि एउटामात्र खेल संघ गठन भएको हुनुपर्ने व्यवस्था छ ।
ऐनको धारा २६ को दफा ५ को उपदफा (४) मा परिषदमा दर्ता गर्दा १ खेलको लागि १ भन्दा बढी तथा एकै उद्देश्य वा समान नाम भएका १ भन्दा बढी संघ वा महासंघलाई दर्ता गरिने छैन भन्ने उल्लेख छ । परिषदको ११३ औं बोर्ड बैठकले संघको विवाद समाधानका लागि उपाध्यक्ष शिव कोईरालाको नेतृत्वमा समिति गठन गरेको थियो ।
समितिले एकै प्रकृतिका २ भन्दा बढी संघलाई छलफलमा बोलाएर विवाद समाधानका लागि प्रयास समेत गरेको थियो । समितिले सहमतिबाट श्रेष्ठको नेतृत्वमा तदर्थ कमिटी गठन गरेको हो ।
समितिले विवादित संघलाई सहमतीबाट समाधान खोज्न आग्रह गरेको छ । बडिबिल्डिङमा राजेशबाबु श्रेष्ठ नेतृत्वको नेपाल बडिबिल्डिङ एन्ड फिट्नेस संघ र तत्कालिन शिवलाल श्रेष्ठको नेतृत्वको नेप्लिज फेडेरेसन बडिबिल्डिङ एन्ड फिटनेस संघ अस्तित्वमा रहँदै आएको थियो ।
तदर्थ समितिले ३ महिनाभित्र साधारणसभा तथा निर्वाचन सम्पन्न गरिसक्नुपर्ने हुन्छ ।
