कास्की, १ पुस । गएराती जीप दुर्घटनामा परी एक महिलाको मत्यु भएको छ । कास्कीको पोखरा महानगरपालिका–२५, हेम्जास्थित हनुमानचोकमा जीप दुर्घटना हुँदा तनहुँ घर भई पोखरा–१०, शिवचोक बस्दै आएकी ३७ वर्षीया वसन्ती मगर मृत्यु भएको हो ।
गएराति करिब सवा १ बजे ग २ च २६८४ नम्बरको जीप अनियन्त्रित भई सडकछेउको विद्युत्को पोलमा ठोक्किएको थियो । दुर्घटनामा परी घाइते भएकी मगरको उपचारका क्रममा मृत्यु भएको प्रहरीले जनाएको छ ।
दुर्घटनामा जीपमा सवार म्याग्दीको मंगला गाउँपालिका–१, मजुलाका ४७ वर्षीय गजेन्द्र पुन घाइते हुनुभएको छ । पुनको पश्चिम क्षेत्रीय अस्पतालमा उपचार भइरहेको छ । चालक फरार रहेकाले खोजीकार्य भइरहेको वडा प्रहरी कार्यालय बगरले जनाएको छ ।
