गोरखा, २४ भदौ । वैदेशिक रोजगारीको सिलसिलामा यूएई (दुबई)मा कार्यरत रहि मृत्यु भएका भिमसेन थापा गाउँपालिका वडा नम्बर ८ निबासी सीताराम गुरुङको शव स्वदेश पठाउन रकम संकलन गरिएको छ ।
गुरुङको शव स्वदेश फिर्ता पठाउनका लागी स्थानीय विष्णु नारायण श्रेष्ठको पहलमा वैदेशिक रोजगारमै कार्यरत बोर्लाङ बासी युवाहरुले बैनब्बे हजार आठ सय पच्चतर रुपैयाँ नगद सहयोग सङ्कलन गरी पठाएको वडा नं. ८ का वडाध्यक्ष विष्णु कुमार श्रेष्ठले जानकारी दिनुभयो ।
‘दुबई मलेसियामा काम गर्ने हाम्रै गाँउका भाईहरुले रकम संकलन गरेर मेरो नाममा आइएमइ गर्दिनु भएको रहेछ ।’ उहाँले भन्नुभयो ‘पठाएको रकम बैकबाट निकालेर म सहितको टोलीले उहाँको आमालाई हस्तान्तरण गरेका हौ ।’ उक्त रकम आज गुरुङकी आमा मनमायालाई हस्तान्तरण गरिएको उहाँले बताउनुभयो ।
गुरुङको उपचारका क्रममा यूएईको शारहजास्थित कुवेती अस्पतालमा मृत्यु भएको थियो । दुई सातादेखि अस्पतालको ईमेर्जेन्सी वार्डमा राखेर उपचार भइरहेका गुरुङको गत भदौ १ गते बिहान मृत्यु भएको अस्पतालले जनाएको छ ।
विगत साढे २ वर्षदेखि रोजगारीको शिलशिलामा यूएईको शारहजास्थित नेष्टो कम्पनीमा काम गर्दै आउनु भएका गुरुङ डिउटी जाने क्रममा आकस्मिक ढलेपछि शारहजाको कुवेती अस्पताल लगिएको थियो । चिकित्सकका अनुसार उहाँको टाउकोमा रगत जमेको (ब्रेन हुम्ब्रेज) कारण उपचार कठिन भएको बताएका थिए ।
