काठमाडौं, २ असार। डोटीमा फट्के तर्ने क्रममा सेती नदीमा खसेर एक जना गर्भवती महिलाको मृत्यु भएको छ ।
रोपाईं गर्नका लागि नदी पारी रहेको खेतमा जान खोज्दा आदर्श गाँउपालिका—६ की १८ वर्षीया ढुल्लु अधिकारीको फट्केबाट नदीमा खसेर मृत्यु भएको स्थानीयले जनाएको छ।
नदीमा खसेकी उहाँको शव फट्के नजिकै फेला परेको थियो । स्थानीयबासिन्दाका अनुसार गत मंसिरमा विवाह गरेकी उहाँ गर्भवति हुनु हुन्थ्यो। उहाँका श्रीमान् रोजगारीको लागि भारतमा छन् ।
पोहोर कात्तिकमा सेतीमा आएको बाढीले झोलुङ्गे पुल बगाएपछि स्थानीयबासिन्दाले अस्थायी फट्के हालेर ओहोरदोहोर गरिरहेका छन् । गत हप्ता पनि यहाँबाट खसेर एक जना गम्भीर घाइते भएका थिए ।
