गोरखा, ९ वैशाख । वैशाख ३० गते हुने स्थानीय तहको निर्वाचनका लागि गोरखामा तयारी तीव्र बनाइएको छ । चुनावको मिति नजिकिएसँगै जिल्लाका ११ ओटै स्थानीय तहमा बिहिबार निर्वाचन अधिकृतको कार्यालय स्थापना गरिएको हो ।
जिल्ला सदरमुकाम रहेको गोरखा नगरपालिकामा गोरखा जिल्ला अदालतका न्यायाधिश समेत रहनु भएका मुख्य निर्वाचन अधिकृत दिनबन्धु बरालले आज कार्यालयको उद्घाटन गर्नु भएको हो । कार्यालयहरुले निर्वाचन आयोगले तोकेको तालिका अनुसार कार्यसम्पादन गर्ने बताइएको छ । जसमा बैशाख ११ र १२ गते मनोनयन दर्ताको तालिका रहेको मुख्य निर्वाचन अधिकृत बरालले जानकारी दिनु भयो ।
त्यस्तै १२ गते नै मनोनयन दर्ता गराएका उम्मेदवारहरुको सूची प्रकाशन गरिने उहाँको भनाई छ । १३ गते उम्मेदवारको विरोधमा उजुरी दिने, १४ र १५ मनोनयनपत्र जाँच गर्ने र उम्मेदवारको विरुद्ध परेका उजुरी माथी छानविन गरी निर्णय गर्ने तालिका रहेको अधिकृत बरालले बताउनु भयो । बैशाख १५ गते मनोनयन भएका उम्मेदवारहरुको नामावली प्रकाशित गर्ने र १६ गते उम्मेदवारले नाम फिर्ता लिने र सोही दिन उम्मेदवारको अन्तिम नामावली प्रकाशनको कार्यतालिका रहेको छ । यसै गरी १७ गते उम्मेदवारलाई निर्वाचन चिन्ह प्रदान गरिने तथा बैशाख ३० गते मतदान हुने उहाँले बताउनु भयो ।
यस्तै जिल्लाको ११ वटै स्थानिय तहमा निर्वाचन अधिकृत समेत खटाइएको छ । जसमा पालुङटार नगरपालिकामा गोकर्णराज पन्त, सिरानचोक गाउँपालिकामा डोलनाथ न्यौपाने, धार्चे गाउँपालिकामा निराज कुमार खत्री र चुमनुब्री गाउँपालिकामा नानीबाबु पोखरेललाई निर्वाचन अधिकृतका रुपमा खटाइएको छ । त्यस्तै गण्डकीमा बासुदेव रेग्मी, बारपाक सुलिकोटमा शेषकान्त पौडेल, शहिद लखन गाउँपालिकामा जिवन प्रसाद आचार्य, अजिरकोटमा कमल राज भण्डारी, आरुघाटमा श्रीधर पौडेल र भिमसेन थापा गाउँपालिकामा खिमानन्द गौतमलाई खटाइएको मुख्य निर्वाचन अधिकृतको कार्यालयले जनाएको छ ।
