गोरखा, २५ असार : गोरखाको पालुङटार नगरपालिकाका भित्रका सामुदायिक विद्यालयमा अध्ययनरत विद्यार्थीहरुको सामुहिक दुर्घटना बिमा गरिएको छ । नगरक्षेत्र भित्रका विद्यालयमा अध्ययनरत ४ हजार ५८२ जना विद्यार्थीहरुको दुर्घटना बिमा गरिएको नगरप्रमुख विवस चिन्तनले जानकारी दिनुभयो ।
‘‘विद्यार्थीहरुको स्वास्थ्य सुरक्षा र दुर्घटनाबाट हुनसक्ने आर्थिक जोखिमलाई ध्यानमा राखेर सामुहिक बिमा कार्यक्रम सुरु गरिएको हो, उहाँले भन्नुभयो,‘‘यसबाट नगरपालिका भित्र सामुदायिक विद्यालयमा अध्ययनरत सवै विद्यार्थीहरु लाभाव्दित हुनेछन् ।’’
विद्यार्थीहरुलाई बिमाको दायरमा ल्याउन नगरपालिका र आइजिआई प्रडेन्सियल इन्स्योरेन्स कम्पनी लिमिटेड बीच आज सम्झौता पत्रमा दुई पक्षीय हस्ताक्षर भएको नगरप्रमुख चिन्तनले बताउनुभयो । सम्झौतामा नगरपालिका भित्रका सवै सामुदायिक विद्यालयमा अध्ययनरत विद्यार्थी दुर्घटनामा परेमा अतिकतम रु ७० हजारसम्मको बिमा उपलब्ध गराइने उल्लेख छ ।
विद्यार्थीहरुको बिमाका लागि नगरपालिकाले प्रति विद्यार्थी रु १०५ बिमा शुल्क र टिकटबापत रु २० शुल्क तिर्नुपर्ने व्यवस्था रहेको उहाँले जानकारी दिनुभयो । बिमा दावी भुक्तानी प्रक्रिया कम्पनीको नियम अनुसार हुने जनाइएको छ ।
नगरपालिकाले सामुदायिक विद्यालयमा अध्ययनरत सवै विद्यार्थीको भविस्यमा हुनसक्ने सम्भावित दुर्घटना र त्यसबाट पर्नसक्ने आर्थिक जोखिम न्युनीकरणका लागि बिमा कार्यक्रम लागू गरेको हो । यसबाट सामुदयिक विद्यालयमा विद्यार्थीको आर्कषण बढाउनसमेत मद्दत पुग्ने नगरप्रमुख चिन्तनको भनाई छ ।
