गोरखा, ३० चैत । नेपाली नयाँ वर्ष २०८३ को पूर्वसन्ध्यामा गोरखामा ‘तेस्रो रैथाने खाना महोत्सव २०८२’ आजबाट सुरु भएको छ । गोरखा होटल व्यवसायी संघको आयोजनामा सञ्चालित उक्त महोत्सव गोरखा नगरपालिकाको प्रवद्र्धनमा सञ्चालनमा आएको हो ।
महोत्सव आजबाट सुरु भई बैशाख १ गतेसम्म सञ्चालन हुनेछ । महोत्सवको उद्घाटन गोरखा नगरपालिकाका नगरप्रमुख कुष्ण बहादु राना मगरले गर्नुभएको हो ।
उद्घाटन समारोह झाँकीरहित र्यालीका साथ सुरु गरिएको थियो, जसले गोरखा बजारको परिक्रमा गरी महोत्सव स्थल रानी पोखरीमा पुगेर औपचारिक कार्यक्रमको थालनी गरेको थियो ।
गोरखा होटल व्यवसायी संघका महासचिव सुमन श्रेष्ठका अनुसार, महोत्सवको उद्देश्य नेपाली नयाँ वर्षको अवसरमा गोरखामा आन्तरिक तथा बाह्य पर्यटकको आगमन वृद्धि गर्नु हो ।
पोखरा जस्तै गोरखालाई पनि नयाँ वर्ष मनाउने गन्तव्यस्थल बनाउने लक्ष्यका साथ महोत्सव आयोजना गरिएको उहाँले बताउनुभयो । महोत्सवमा गोरखाका विभिन्न जातजातिका रैथाने खानाको प्रस्तुति, तिनीहरूको धर्म, भेषभूषा र सांस्कृतिक पहिचान झल्काउने कार्यक्रमहरू समावेश गरिएका छन् ।
२ दिनसम्म हुने महोत्सव सञ्चालनमा करिब ३० लाख बराबरको कारोबार हुने आयोजकले अनुमान गरेको छ । गोरखा होटल संघले यसअघि २०८० र ०८१ सालमा सडक खाना महोत्सवको आयोजना गरेको थियो ।
यस वर्षको महोत्सवले गोरखाको संस्कृति, एकता र विरताको पहिचानलाई उजागर गर्दै आन्तरिक पर्यटन प्रवद्र्धनमा नयाँ आयाम थप्ने अपेक्षा गरिएको छ ।
