गोरखा, ७ चैत । गोरखा सदरमुकामको पुरानो बसपार्कदेखि खोेलखोलेसम्म सडक विस्तार तथा नाला–फुटपाथ निर्माणको काम अघि बढाउन सडक किनारमा रहेका अस्थायी संरचना हटाउन निर्देशन दिइएको छ ।
गोरखा नगरपालिका वडा नं ८ ले सडक विस्तारको काम तत्काल अघि बढाउनु पर्ने भएकाले तोकिएको समयभित्र टहरा, घुम्ती पसल तथा निर्माण सामग्री हटाएर स्थान खाली गर्न आग्रह गरिएको वडाध्यक्ष ऋषिराम खत्रीले जानकारी दिनुभयो ।
नगरपालिकाको आर्थिक वर्ष २०८२÷०८३ को स्वीकृत वार्षिक कार्यक्रमअन्तर्गत पुरानो बसपार्कदेखि खोलखोलेसम्मको सडक क्षेत्रमा नाला तथा फुटपाथ निर्माण कार्य सञ्चालन अघि बढाउन लागेको हो । अमर सिंह राजमार्ग अन्तर्गत पर्ने उक्त सडकको दायाँ–बायाँ करिब ८÷८ मिटर क्षेत्रभित्र रहेका अस्थायी संरचना हटाउनुपर्ने उहाँले बताउनुभयो ।
वडा कार्यालयले प्रतिक्षालय चोकदेखि खोलखोलेसम्म सडक किनारमा अस्थायी टहरा निर्माण गरी सञ्चालनमा रहेका ग्यारेज, घुम्ती पसल तथा निर्माण सामग्री भण्डारण गरिएका स्थानहरू हटाउन भनेको छ ।
वडा अध्यक्ष ऋषिराम खत्रीले स्थानीयलाई विकास निर्माण कार्यमा सहयोग गर्न आग्रह गर्नुभएको छ । उहाँका अनुसार निर्धारित समयसीमाभित्र संरचना नहटाइएमा प्रचलित कानुनअनुसार थप प्रक्रिया अघि बढाइने बताउनुभयो ।
नगरपालिकाले सडक व्यवस्थापन, नाला निर्माण तथा फुटपाथ विस्तारमार्फत गोरखा बजार क्षेत्रलाई व्यवस्थित र सुरक्षित बनाउने लक्ष्य राखेको जनाएको छ ।
