काठमाडौं, ६ पुस । मिराज ढुंगाना नेतृत्वको जेनजी समूहले भोलि संयुक्त आन्दोलन गर्ने घोषणा गरेको छ । आइतबार पत्रकार सम्मेलन गर्दै जेनजी समूहले सडकमा रहेका सबै जेनजी अभियन्ता,घाइते तथा सहिद परिवारलाई समेटेर लैजाने योजनासहित सोमबार संयुक्त आन्दोलन गर्ने घोषणा गरेको हो । उहाँ नेतृत्वको समूहसँगै अन्य ३० बढी जेनजी समूह पनि आन्दोलनमा सहभागी हुनेछन् ।
जेनजी अभियन्ता ढुंगानाले आन्दोलन शान्तिपूर्ण रहने जानकारी दिनुभयो । उहाँका अनुसार आन्दोलन माइतीघरबाट बिहान ११ बजेबाट सुरू हुनेछ। आन्दोलन शान्तिपूर्ण तरिकाले हुन्छ । सुक्षाको जिम्मा सरकारले लिनुपर्छ,उहाँले भन्नुभयो ।
प्रधानमन्त्री सुशीला कार्की नेतृत्वको सरकारले आन्दोलनको मर्म बुझ्न नसकेको बताउँदै उहाँले सरकारको विकल्प आवश्यक रहेको बताउनुभयो । सर्वपक्षीय सरकार गठनको माग गर्दै आन्दोलनको तयारी गरेको उहाँले जानकारी दिनुभयो । त्यसका लागि सबै जेनजी समूह एकतावद्ध भइसकेको उहाँको भनाइ छ ।
जुन उद्देश्यले आन्दोलन गरिएको थियो त्यो पूरा हुन सकेन । प्रधानमन्त्री सुशीला कार्कीबाट निर्वाचन पनि हुँदैन । दलहरूमा पनि उहाँले निर्वाचन गर्नुहुन्छ भन्ने विश्वास पनि छैन,उहाँले भन्नुभयो,पहिला सरकारको वैधानिकता पनि थिएन । अहिले सरकारको औचित्य पनि छैन ।
