गोरखा, ४ पुस । गोरखामा आयोजना हुने १२ औँ गोरखा महोत्सव यही पौष १४ गतेदेखि २८ गतेसम्म सञ्चालन हुने भएको छ । गोरखा उद्योग वाणिज्य संघको आयोजनामा सदरमुकामस्थित खेलकुद मैदानमा हुने यो महोत्सव प्रदेश स्तरीय हुने जनाइएको छ ।
महोत्सवको उद्घाटन गण्डकी प्रदेशका मुख्यमन्त्री सुरेन्द्रराज पाण्डेले गर्ने कार्यक्रम तय भएको गोरखा उद्योग वाणिज्य संघका अध्यक्ष भगवानबाबु मास्केले जानकारी दिनुभयो ।
आज गोरखा सदरमुकाममा आयोजित पत्रकार सम्मेलनमार्फत महोत्सवसम्बन्धी विस्तृत जानकारी सार्वजनिक गर्दै अध्यक्ष मास्केले यसअघि महोत्सव पौष ४ गतेदेखि १४ गतेसम्म गर्ने तयारी भए पनि विभिन्न कारणले सो समयमा आयोजना गर्न नसकिएको बताउनुभयो ।
ती कारणहरू समाधान भएसँगै नयाँ मिति तय गरी तयारीलाई तीव्र बनाइएको उहाँको भनाइ छ । महोत्सवलाई व्यवस्थित र प्रभावकारी रूपमा सम्पन्न गर्नका लागि २२ वटा उप–समिति गठन गरी काम सुरु गरिएको आयोजकले जनाएको छ ।
पत्रकार सम्मेलनमा बोल्दै अध्यक्ष मास्केले गोरखा महोत्सवको मुख्य उद्देश्य क्रेता र विक्रेताबीच पुलको काम गर्नु रहेको स्पष्ट पार्नुभयो। स्थानीय उत्पादन, घरेलु उद्योग, कृषि तथा व्यवसायिक गतिविधिलाई प्रवद्र्धन गर्ने लक्ष्यसहित महोत्सव आयोजना गरिएको उहाँको भनाइ छ । महोत्सव स्थलमा १०० वटा स्टल राखिने छन्।
ती स्टलहरूमा घरेलु उत्पादनदेखि किसानले उत्पादन गरेका विभिन्न कृषि उपज, स्थानीय तथा क्षेत्रीय उत्पादनहरूको प्रदर्शन तथा बिक्री गरिनेछ ।
साथै, गोरखाको पहिचान झल्कने विभिन्न संस्कृति, कला र परम्परासँग सम्बन्धित सामग्रीहरू पनि प्रदर्शनीमा राखिने आयोजकले जनाएको छ । १५ दिनसम्म सञ्चालन हुने महोत्सवमा करिब १ लाख दर्शकले अवलोकन गर्ने अनुमान गरिएको छ। सो अवधिमा करिब ३ करोड रुपैयाँ बराबरको आर्थिक कारोबार हुने अपेक्षा गरिएको अध्यक्ष मास्केले जानकारी दिनुभयो । महोत्सव सञ्चालनका लागि कुल ८५ लाख रुपैयाँ खर्च हुने अनुमान गरिएको छ ।
गोरखा उद्योग वाणिज्य संघका अनुसार महोत्सवले स्थानीय व्यवसायी, किसान र उपभोक्तालाई एकै स्थानमा जोड्दै आर्थिक गतिविधि बढाउने विश्वास लिइएको छ। महोत्सवमार्फत गोरखाको उत्पादन, सम्भावना र व्यावसायिक क्षमतालाई प्रदेश तथा बाह्य बजारसम्म चिनाउने लक्ष्य पनि लिइएको आयोजकको दाबी छ ।
