गोरखा, ३ पुस । उत्तरी गोरखाको धार्चे गाउँपालिकामा उपभोक्ता समितिका पदाधिकारीहरूका लागि योजना कार्यान्वयन सम्बन्धी अभिमुखीकरण सुरु भएको छ ।
गाउँपालिका अन्तर्गत वडा नं. २, ६ र ७ का उपभोक्ता समितिका पदाधिकारीहरुका लागि बुधबार योजना कार्यान्वयन सम्बन्धी अभिमुखीकरण कार्यक्रम सञ्चालन गरेको हो ।
गाउँपालिकाले चालु आर्थिक वर्षमा सञ्चालन हुने विकास योजनाहरूलाई प्रभावकारी, पारदर्शी र समयमै सम्पन्न गर्ने उद्देश्यले अभिमुखीकरण कार्यक्रम सञ्चालन गरेको जनाएको छ ।
अभिमुखीकरणमा सहभागीहरुलाई योजना सम्झौता प्रक्रिया, योजना सुरु गर्नुपर्ने औपचारिक चरणहरु, कार्यान्वयनका विभिन्न चरण, बजेट व्यवस्थापन, आर्थिक अनुशासन, भुक्तानी प्रक्रिया, प्राविधिक मापदण्डको पालना, गुणस्तर सुनिश्चित गर्ने उपाय तथा योजना अनुगमन र मूल्याङ्कनका विषयमा विस्तृत जानकारी गराइएको आयोजकको भनाई छ ।
त्यस्तै सहभागीहरुलाई सार्वजनिक खर्चमा पारदर्शिता कायम गर्ने, योजना सञ्चालन गर्दा कानुनी तथा प्राविधिक मापदण्ड नछोड्ने र समुदायको सहभागितालाई प्राथमिकतामा राख्नुपर्ने विषयमा विशेष जोड दिइएको छ ।
कार्यक्रमलाई सम्बोधन गर्दै प्रमुख अतिथि गाउँपालिका अध्यक्ष लक्ष्मण गुरुङले उपभोक्ता समितिहरू स्थानीय विकासका महत्वपूर्ण साझेदार भएको उल्लेख गर्दै योजना कार्यान्वयनमा जिम्मेवारीपूर्वक भूमिका निर्वाह गर्न आग्रह गर्नुभयो ।
उहाँले योजना समयमा सम्पन्न भए मात्र विकासको प्रतिफल आम नागरिकले अनुभूति गर्न सक्ने बताउनुभयो । त्यस्तै, गाउँपालिकाकी उपाध्यक्ष सुनिला गुरुङले महिला, दलित र सीमान्तकृत समुदायको सहभागितालाई योजनामा समावेश गर्न उपभोक्ता समितिहरूले ध्यान दिनुपर्ने धारणा राख्नुभयो ।
गाउँपालिकाका प्रमुख प्रशासकीय अधिकृत बुद्धिराम बस्नेतको अध्यक्षतामा अभिमुखीकरण कार्यक्रम सञ्चालन गरिएको हो । कार्यक्रममा गाउँपालिका अध्यक्ष गुरुङ, गाउँपालिका उपाध्यक्ष सुनिला गुरुङ, सम्बन्धित वडा अध्यक्षहरु, वडा सदस्यहरु, प्राविधिक कर्मचारी तथा उपभोक्ता समितिका पदाधिकारीहरुको उल्लेख्य सहभागिता रहेको थियो ।
गाउँपालिकाले बुधबार वडा नम्बर १ र ३ का उपभोक्ता समितिका पदाधिकारीहरु तथा विहिबार वडा नम्बर ४ र ५ का उपभोक्ता समितिका पदाधिकारीहरुलाई पनि योजना कार्यान्वयन सम्बन्धी अभिमुखीकरण कार्यक्रम सञ्चालन गर्ने जनाएको छ ।
गाउँपालिकाका प्रमुख प्रशासकीय अधिकृत बुद्धिराम बस्नेतको अध्यक्षतामा अभिमुखीकरण कार्यक्रम सञ्चालन गरिएको हो । कार्यक्रममा गाउँपालिका अध्यक्ष गुरुङ, गाउँपालिका उपाध्यक्ष सुनिला गुरुङ, सम्बन्धित वडा अध्यक्षहरु, वडा सदस्यहरु, प्राविधिक कर्मचारी तथा उपभोक्ता समितिका पदाधिकारीहरुको उल्लेख्य सहभागिता रहेको थियो ।
