गोरखा २४ कात्तिक : उत्तरी गोरखाको मनास्लु हिमाल आरोणका लागि नयाँ रुटको प्रारम्भिक अध्ययन सुरु भएको छ । मनाङको नासोँ गाउँपालिकाले मनास्लु हिमाल आरोहणको नयाँ रुटको अध्ययन थालेको हो । गाउँपालिकाको समन्वय र अन्नपूर्ण संरक्षण क्षेत्र आयोजना (एक्याप) को प्रायोजनमा रुट सर्भे सुरु गरिएको प्रारम्भिक अध्ययनमा संलग्न कर्मा शेर्पाले जानकारी दिनुभयो ।
अहिले मनास्लु आरोहीहरु काठमाडौंबाट गोरखाको आरुघाट, सामागाउँ हुँदै यात्रा गर्दै आएका छन् र पूर्वतर्फबाट मनास्लु आरोहण सुरु गर्छन् । तर, मनाङको नासोँ गाउँपालिकाले काठमाडौंबाट लमजुङको बेंसीशहर हुँदै धारापानी, तिल्चे, गुवा, सुती खोला, याकखर्क हुँदै भिमथाङमा बास बसेर पश्चिमतर्फबाट आरोहणको सम्भावनाबारे अध्ययन सुरु गरेको हो ।
सामागाउँ र भिमथाङ दुवैतर्फको आरोहण रुट ६ हजार मिटर माथि क्याम्प थ्रीमा पुगेर मिसिन्छ । गोरखा चुमनुब्री गाउँपालिकामा पर्ने मनास्लु हिमाल ८ हजार १ सय ६३ मिटर अग्लो छ । मनास्लु हिमाल सन् १९५६ मे ९ मा जापानका टी इमानिस र नेपालका ग्याल्सेन नोर्बुले पहिलोपटक आरोहण गरेका थिए । त्यतिबेला मनाङको भिमथाङबाटै आरोहण भएको र पछि रुटमा क्षति पुगेपछि गोरखाको सामागाउँतर्फबाट आरोहण थालिएको नासोँ गाउँपालिका अध्यक्ष धनबहादुर गुरुङले बताउनुभयो ।
भिमथाङतर्फको रुटबाट आरोहण गर्न सम्भव छ भन्ने पुष्टि भएमा उक्त रुट मनास्लु हिमाल अरोहणका लागि सबैभन्दा सजिलो र छोटो हुने उहाँको दावी छ ।
