गोरखा, २८ असार : उत्तरी गोरखाको धार्चे गाउँपालिकाले मासु उत्पादन गर्ने किसानलाई नगद अनुदान वितरण गरेको छ । चालु आर्थिक वर्ष २०८१/०८२ मा सञ्चालन गरिएको ‘मासुजन्य उत्पादन अनुदान कार्यक्रम’ अन्तर्गत पालिकाभित्रका ६१ जना किसानलाई रु ६ लाख ३ सय ५ बराबरको अनुदान रकम प्रदान गरिएको गाउँपालिकाका अध्यक्ष लक्ष्मण गुरुङले जानकारी दिनुभयो ।
“पालिकालाई मासुमा आत्मानिर्भर बनाउन र मासु तथा मासुजन्य उत्पादनका लागि किसानलाई हौसला प्रदान गर्न अनुदान कार्यक्रम सञ्चालन गरिएको हो, उहाँले भन्नुभयो, ‘‘कार्यक्रममार्फत सानासाना पशुपालक किसानले पनि लाभको अवसर प्राप्त गरेका छन् ।’’
कार्यक्रमले मासुजन्य उत्पादन वृद्धि मात्र नभई विस्तारै स्थानीय रोजगारी सिर्जनामा समेत टेवा पुग्ने गाउँपालिका अध्यक्ष गुरुङको भनाइ छ । मासुजन्य उत्पादनका आधारमा अनुदान प्राप्त गर्ने किसानहरुले रु ९ सयदेखि ५० हजारसम्म नगद अनुदान प्राप्त गरेको गाउँपालिका पशुसेवा शाखाका प्रमुख हर्क कार्कीले जानकारी दिनुभयो ।
‘‘अनुदानका लागि किसानको गोठमै पुगेर स्थलगत निरीक्षण तथा नापतौल गरेर अनुदान वितरण गरिएको छ, उहाँले भन्नुभयो, ‘‘अनुदान कार्यक्रमले किसानहरुमा व्यवसायिक पशुपालनतर्फको आकर्षण बढ्न थालेको छ ।”
गाउँपालिकाले खसीको मासुमा प्रतिकेजी रु ३०, राँगाको मासुमा रु १५, बंगुरको मासुमा रु ४० र बोइलर कुखुराको (३५–४५ दिन उमेरका) प्रति गोटा रु ७० का दरले नगद अनुदान दिने व्यवस्था गरेको छ । अनुदान प्राप्त गर्ने किसानलाई बैंक खातामार्फत भुक्तानी दिने गरिएको प्रमुख कार्कीले बताउनुभयो ।
गाउँपालिकाले वडा नम्बर १ का ९ जना, वडा नम्बर २ का २२ जना, वडा नम्बर ३ का १ जना, वडा नम्बर ४ का ३ जना, वडा नम्बर ५ का २ जना, वडा नम्बर ६ का ३ जना र वडा नम्बर ७ का २१ जना किसान लाभान्वित भएका छन् । मासुजन्य उत्पादनमा अनुदान पाएपछि किसानहरु खुशी भएका छन् ।
“पहिलो पटक आफ्नो मेहनतको मूल्य पाइएको छ, स्थानीय किसान हिरामाया गुरुङले भन्नुभयो, ‘‘नगद अनुदान कार्यक्रमले हामीजस्ता साना किसानलाई ठूलो हिम्मत दिएको छ ।”
गाउँपालिकाले आगामी आर्थिक बर्षका लागिसमेत मासुजन्य उत्पादन अनुदानका लागि बजेट बिनियोजन गरेको उहाँले बताउनुभयो । किसानहरुलाई पशुपालनमा आत्मनिर्भरता र व्यावसायिकता अभिवृद्धि गर्ने योजना बनाएको जनाएको छ ।
