गोरखा, २९ जेठ : अध्याधिक गर्मीका कारण गोरखाको पालुङटार नगरपालिका भित्रका विद्यालयहरुमा आजदेखि पठनपाठन बन्द गरिएको छ । नगरपालिका भित्रका सवै सामुदायिक तथा संस्थागत विद्यालयहरुमा दुईदिनका लागि पठनपाठन बन्द गर्ने निर्णय गरिएको नगरप्रमुख विवश चिन्तनले जानकारी दिनुभयो ।
‘‘पछिल्लो केहीदिन यता अत्याधिक गर्मी बढेपछि जनजीवन निक्कै प्रभावित बनेको छ, उहाँले भन्नुभयो, ‘‘गर्मीका कारण बालबालिकाहरुलाई समस्या हुनसक्ने भएकाले नगरपालिकाले मातहतका सवै विद्यालयहरु आज र भोली बन्द गर्ने निर्णय गरेको हो ।’’
अत्याधिक गर्मीले बालबालिकाहरु विद्यालय आउन जान र पठनपाठनमा समस्या भइरहेकाले विद्यालय सञ्चालन गर्न कठिनाइ भएको नगर शिक्षा अधिकारी मनोज नेपाली सिर्मलले जानकारी दिनुभयो । उहाँले भन्नुभयो, ‘‘नगरपालिकाले अभिभावक, विद्यालय शिक्षक तथा सञ्चालक समितिबाट सुझावका लिएर विद्यालय केहीदिन बन्द गर्ने निर्णय गरेको हो ।’’
असार १ गतेबाट पुनः नियमित रूपमा पठनपाठन सञ्चालन हुने नगरपालिकाले जनाएको छ ।
