गोरखा, ७ जेठ । उत्तरी गोरखाको धार्चे गाउँपालिकामा डकर्मी तालिम सम्पन्न भएको छ । महिलाहरुको क्षमता विकास गर्ने र आयआर्जन गरी आत्मनिर्भर गराउने उद्देश्यले दिईएको एक हप्ते आधारभूत डकर्मी तालिम सम्पन्न भएको गाउँपलिकाका प्रमुख प्रशासकीय अधिकृत काजीमान सुनारले जानकारी दिनुभयो ।
तालिममा पालिका भित्रको सातै वटा वडाबाट ३४ जना महिलाहरुको सहभागिता रहेको उहाँले बताउनुभयो । तालिम महिलाका लागि लक्षित गरेर संचालन गरिएकाले गाउँपालिकाले जनाएको छ । महिलाहरुलाई गारो तथा पर्खाल लगाउने, प्लास्टर गर्ने, काठ चिर्ने लगायत डकमीं सीपहरु सिकाइएको प्रमुख प्रशासकीय अधिकृत सुनारले बताउनुभयो ।
सामान्य पर्खाल लगाउने, प्लास्टर गर्ने काम महिलाहरुले पनि सजिलै गर्न सक्छन् । पालिका भित्र संचालन हुने ठुला तथा साना योजनाहरुमा महिलाहरुको सहभागिता बढाएर उहाँहरुको जीविकोपार्जन बढाउने पालिकाको उदेश्य रहेको छ ।
पालिका भित्र हुने विकास निर्माणका योजनाहरुमा बाहिरबाट कामदार मगाउनुपर्ने बाध्यता रहेकाले महिला लक्षित कार्यक्रम सञ्चालन गरेको प्रमुख प्रशासकीय अधिकृत सुनारले बताउनुभयो ।
अहिले पुरुषहरु प्राय वैदेशिक रोजगारीमा जाने, गाउँमा प्राय महिलाहरु धेरै हुने भएकाले पनि महिलाहरुलाई आत्मनिर्भर गराउन र कामका लागि आवश्यक जनशक्ति तयार गर्न सो तालिम आवश्यक रहेको बताइएको छ ।
डकर्मीको काम महिलाहरुले पनि सजिलै गर्न सक्ने भएकाले तालिमका लागि पालिकाले महिलाहरुलाई बढी जोड दिएको प्रमुख प्रशासकीय अधिकृत सुनारले बताउनुभयो ।
जेठ १ गते बिहिबारबाट सुरु भएको तालिम आज एक कार्यक्रमका बिच सम्पन्न भएको हो । तालिमको लागी पालिकाले रु १६ लाख रुपैँया बिनियोजन गरेर डकर्मी सीप विकास तालिम संचालन गरेको गाउँपलिकाले जनाएको छ ।
