काठमाडौँ, २० चैत । म्यानमारमा हालै गएको विनाशकारी भूकम्पका कारण भएको धनजनको क्षति पश्चात प्रभावितको उपचार र राहत लिएर नेपाली सेनाको टोली आज त्यसतर्फ प्रस्थान गरेको छ ।
प्रमुख सेनानी रामचन्द्र श्रेष्ठको नेतृत्वमा १२ जना चिकित्सकीय टिम, ४ जना बन्दोबस्ती सहायता टिम र ६ जना क्रु मेम्बरसहित कुल २२ सदस्यीय टोली नेपाली सेनाको विमानद्वारा म्यानमारतर्फ प्रस्थान गरेको हो ।
विभिन्न प्रकृतिका आवश्यक औषधि एवं उपकरणसहित उक्त टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरु सहभागी भएका छन् ।
उक्त टोलीले करिब एक साता म्यानमार भूकम्पमा परी घाइते भएकाहरूको स्वास्थ्य उपचारमा खटिने नेपाली सेनाले जनाएको छ ।
