गोरखा, १९ चैत । गोरखाको बारपाक सुलिकोट गाउँपालिकाले एसइइ परिक्षा दिएर बसेका बिद्यार्थीहरुलाई निःशुल्क कम्प्युटर तालिम दिने तयारी गरेको छ ।
हालै सम्पन्न एइइ परिक्षा दिएर बसेका पालिका भित्रका २७० जना बिद्यार्थीहरुलाई पालिकाले ३ महिनो निःशुल्क आधारभूत कम्प्युटर तालिमा दिन लागेको प्रमुख प्रशासकीय अधिकृत सुवास आलेले जानकारी दिनुभयो ।
अहिले प्राविधिक ज्ञान अन्तरर्गत कम्प्युटर चलान नजान्नेले रोजगारी समेत पाउन मुश्किल हुने भएकोले बिद्यार्थी लक्षित कार्यक्रम ल्याईएको अधिकृत आलेले बताउनुभयो । ‘कम्प्युटरको ज्ञान भएन भने सबै क्षेत्रमा पछाडी परिन्छ’ उहाँले भन्नुभयो ‘बिद्यार्थीहरुलाई प्रविधिमा क्षमतावान बनाउन र स्वरोजगार बनाउन यसले मद्वत पनि गर्छ ।’
उहाँका अनुसार पालिकाले हालै सूचना जारी गर्दै बिद्यार्थीहरुबाट आवेदन माग गरेको छ । पालिका भित्र पायक पर्ने सूर्यज्योति मावि ताकुकोट, माझथर मावि स्वाँरा, हिमालय मावि सौरपानी, हिमालय मावि बारपाक, शैलपुत्ती मावि पाँचखुवा देउराली, दुर्गा मावि रञ्चोक र अन्तरज्योति मावि डाँडागाउँमा बिद्यार्थीहरुलाई सम्र्पक राख्न भनेको हो ।
आर्थिक बर्ष २०८१÷०८२ को स्वीकृत कार्यक्रम ‘एसइइ दिएका बिद्यार्थीहरुलाई कम्प्युटर शिक्षा’ नामक कार्यक्रम अन्तरर्गत बजेट बिनियोजन गरेर तालिम दिने ब्यवस्था गरीएको अधिकृत आलेले बताउनुभयो । उक्त कार्यक्रमकालागी पालिकाले ३ लाख रुपैयाँ बिनियोजन गरेको छ ।
पालिका भित्र रहेको सबै माध्यामिक बिद्यालयहरुमा यो तालिमा सञ्चालनको तयारी पुरा भएको छ । बिद्यार्थीहरुकोलागी आवश्यक कम्प्युटर र त्यसका शिक्षक सबै बिद्यालयमा भएकाले पनि तालिम सञ्चालनमा कुनै समस्या नआउने उहाँको भनाई छ ।
