काठमाडौ, ११ चैत । सत्यनिरूपण तथा मेलमिलाप आयोग र बेपत्ता पारिएका व्यक्तिको छानबिन आयोग (टिआरसी) का पदाधिकारीको नियुक्तिलगायतका बारेमा छलफल गर्न प्रमुख दलका शीर्ष नेताबीच आज छलफल हुने भएको छ ।
प्रधानमन्त्री तथा नेकपा एमाले अध्यक्ष केपी शर्मा ओली, नेपाली काँग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डबीच दिउँसो ४ बजेपछि सिंहदरवारमा छलफलको तयारी भएको प्रधानमन्त्री ओलीको सचिवालयले जनाएको छ ।
बैठकमा गणतन्त्रविरोधी गतिविधि, आगामी रणनीतिका बारेमा पनि कुराकानी हुने प्रधानमन्त्री ओलीका विज्ञ सल्लाहकार अग्नि खरेलले जानकारी दिनुभयो । खरेलले शीर्ष नेताबीचको बैठकका लागि समन्वय गर्नुका साथै टीआरसी ऐन् कार्यान्वयनका लागि बहुपक्षीय छलफललाई तीव्रता दिनुभएको छ ।
