गोरखा ३ फागुन । राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन मूल्यांकनमा गोरखाका पालिकामध्ये बारपाक सुलिकोट गाउँपालिका उत्कृष्ट भएको छ । बारपाक सुलिकोट कार्यसम्पादन मूल्याङ्कमा ७०.८ अंक प्राप्त गरेको राष्ट्रिय प्राकृतिक स्रोत तथा वित्त आयोगले सार्वजनिक गरेको नजितामा उल्लेख छ । भीमसेन थापा गाउँपालिका यसपटक जिल्लाका पालिकाहरु मध्ये दोस्रो हुन सफल भएको छ ।
भीमसेनले कार्यसम्पादन मूल्याङ्कमा ६९. ६ अंक प्राप्त गरेको आयोगले जनाएको छ । आयोगले सार्वजनिक गरेको कार्यसम्पादन मूल्याङ्कमा आरुघाट गाउँपालिकाले आरुघाट ६८.९ अंक प्राप्त गर्दै जिल्लामा तेस्रो भएको छ भने चुमनुब्री गाउँपालिकाले ६७.१ अकं ल्याएर चौथो बनेको छ । त्यस्तै धार्चे गाउँपालिकाले धार्चे र पालुङटार नगरपालिकाले समान ६६.८ अंक ल्याएको छ ।
सहिद लखन गाउँपालिकाले सहिद लखन ६६.४, गोरखा नगरपालिकाले ६०.७, गण्डकी गाउँपालिकाले ६० अंक, सिरानचोक गाउँपालिकाले सिरानचोक ५८.६ र अजिरकोट ५७.१ अंक प्राप्त गरेको आयोगले सार्वजनिक गरेको नजितामा उल्लेख गरिएको छ ।
आयोगले पालिकाले समयमै सभामा बजेट पेश गरे/नगरेको, पारित गरे/नगरेको, खर्च अवस्था, बेरुजु, लेखा परीक्षणले औँल्याएको बेरुजु, स्थानीय सञ्चित कोष व्यवस्था प्रणालीको प्रयोग, आवधिक योजना गरे/नगरेको, राजस्वको विभाजन गरे/नगरेको लगायत बिभिन्न १७ वटा सूचकहरूको आधारमा मूल्याङकन गर्ने गर्दछ । आयोगले सार्वजनिक गरेको नजितामा चित्त नबुझेमा सात दिन भित्रमा आवश्यक आधार प्रमाणसहित पुनरावलोकनका लागि आयोग समक्ष निवेदन दिन पनि अनुरोध गरेको छ ।
