गोरखा, १६ मङ्सिर ः गोरखा नगरपालिका–५ मा भइरहेको वडाध्यक्ष पदको उपनिर्वाचनमा ५७ प्रतिसत भन्दाबढी मत खसेको छ । दिउँसो २ः३० बजेसम्म दुईवटा मतदान केन्द्रमा गरी १ हजार २ सय ८० मत खसेको मुख्य निर्वाचन अधिकृत शिवबहादुर रानाभाटले जानकारी दिनुभयो ।
उहाँका अनुसार अहिलेसम्म स्वाँरास्थित गोरखकाली आधारभूत विद्यालयको मतदान केन्द्रमा ४ सय २३ मत खसेको छ । त्यहाँ कुल ७ सय २४ मतदाता रहेका छन् । त्यस्तै अमराईस्थित शिवशक्ति आधारभूत विद्यालयमा रहेको मतदान केन्द्रमा ८ सय ५७ मत खसेको उहाँले बताउनुभयो ।
शिवशक्ति आधारभूत विद्यालयको मतदान केन्द्रमा १ हजार ५ सय १ जना मतदाताहरु रहेका छन् ।
दुवै मतदान केन्द्रमा विहान ७ बजेदेखि नै मतदान सुरु भएको थियो । मतदाताहरु लाइनमा बसेर शान्तिपूर्वक उत्साहका साथ मतदान गरिरहेका अधिकृत रानभाटले बताउनुभयो । यस वडामा कुल २ हजार २ सय २५ मतदाता रहेका छन् ।
गोरखा नगरपालिका ५ को उपनिर्वाचनमा बिभिन्न ९ वटा राजनीतिक दलबाट ९ जना वडाध्यक्षको प्रतिस्पर्धामा रहेका छन् ।
