काठमाडौ, ३ असोज ।चाडपर्वलाई लक्षित गरि ४९ हजार मेट्रिक टन चिनी आयात हुने सरकारले जनाएको छ । वाणिज्य आपूर्ति तथा उपभोक्ता संरक्षण विभागकाअनुसार १९ हजार मेट्रिक टन चिनी ल्याउने जिम्मा ७ वटा कम्पनीले पाएका छन् । जसमध्ये १६ सय मेट्रिक टन चिनी भन्सारमा आइपुगेको छ भने बाँकी पनि आउने क्रममा छ ।
सरकारी निकायले ल्याउने ३० हजार मेट्रिक टनमध्ये १५ हजार मेट्रिक टन चिनी ल्याउने जिम्मेवारी पाएको खाद्य व्यवस्था तथा व्यापार कम्पनीले यसको प्रक्रिया अघि बढाएको छ । थप १५ हजार मेट्रिक टन चिनी ल्याउने जिम्मेवारी पाएको साल्ट ट्रेडिङ कर्पोरेसनले ११ दिनको सूचनामार्फत टेन्डर आह्वान गरेको छ ।
तर गत वर्ष सरकारी यी २ निकायलाई १०÷१० हजार मेट्रिक टन चिनी आयातको जिम्मा दिइए पनि आयात गरेका थिएनन् ।
यस वर्ष त्यस्तो अवस्था नआउने उद्योग वाणिज्य तथा आपूर्ति मन्त्री दामोदर भण्डारीले दाबी गर्नुभयो । चाडवाडका समयमा चिनीको मूल्य पनि नबढ्ने मन्त्री भण्डारीले बताउनुभयो ।
चाडपर्व लक्षित चिनी आयात हुन थालिसकेको र अभाव नहुने सरकारले दाबी गरे पनि बजारमा भने चिनीको भाउ बढ्न थालिसकेको छ ।
बजारभाउ नियन्त्रणका लागि सरकारले मूल्य तोकेर बजार अनुमगनलाई प्रभावकारी बनाउनुपर्ने उपभोक्ताको माग छ । नेपालमा वार्षिक तीन लाख मेट्रिक टन चिनी खपत हुँदै आएको सरकारी तथ्याङ्क छ ।
