गोरखा, २७ वैशाख : गोरखा नगरपालिका–८ प्रतिक्षालयका सन्दिप ढकाल रातको ३ बज्न नपाउदै आजभोली खानेपानीका लागि एउटा जार र बोत्तल लिएर धारामा पुग्नुहुन्छ । विहान अलि ढिलो पुगे एक जार पानीका लागि घण्टौ लाइनबस्नु पर्ने वाध्यता रहेकाले उहाँ सकभर राती नै खानेपानी ल्याउनका लागि धारा पुग्ने गर्नुभएको हो ।
‘‘रातको समयमा पुगेपनि कहिले त डेढदुई घण्टा नै पालो नपर्खेसम्म पानी भर्न पाइदैन, ढकालले भन्नुभयो, ‘‘कहिले त फर्कदा उज्यालो नै हुन्छ ।’’ सुख्यायाम लागेसंगै खानेपानीको मुहान सुक्दै जाने र बजार क्षेत्रमा वितरण गरिएका लाइनको पानी समेत नियमित नआउदा गएको केही महिनादेखि गोरखा बजार क्षेत्रमा खानेपानीको चरम अभाव हुन थालेको हो ।
‘‘घरमा धारा छ, तर पानी कहिले आउछ भन्ने कुनै टुङ्गो हुँदैन, गोरखा नगरपालिका–६ की स्थानीय गोमा श्रेष्ठले भन्नुभयो,‘‘पानी आइहाल्यो भने पनि पिउन डराउनुपर्ने भएपछि बरु नजिकैको सार्वजनिक धारामा पुगेर खानेपानी ल्याउने गरेको छु, त्यहाँ पानी पालो कुर्दाकुर्दा हैरान हुनुपर्छ ।’’
सार्वजनिक धारामा समेत यतिवेला मूल सुकेर पानी सानो भएकाले एक गाग्री पानीका लागि धेरै समय कुर्नुपर्ने बाध्यता रहेको उहाँ बताउनुहुन्छ । गोरखा बजार क्षेत्रमा खानेपानीको समस्याले दुःख नपाउने सायदै कमै होलान् । खानेपानीको चरम अभाव भएपछि गएको बिहीबार रानीबन क्षेत्रका स्थानीयहरु त रित्तो गाग्री लिएर पानी माग्दै प्रमुख जिल्ला अधिकारीको कार्यकक्षमै पनि पुगे ।
बजार क्षेत्रमा खानेपानी वितरण गर्दै आएको दरौँदी लिफ्टिङ खानेपानी आयोजनाले धारामा पानी नदिएको भन्दै विरोध स्वरुप प्रसासनमा पुगेर उनीहरुले प्रमुख जिल्ला अधिकारी भोला दाहालको ध्यानाकर्षण गराएका हुन् । दरौँदी लिफ्टिङ खानेपानी आयोजनाको चरम लापरवाहीका कारण उपभोक्ताले खानेपानीमा दुःख भोग्नु परेको उनीहरुको भनाई छ ।
दरौँदी लिफ्टिङ खानेपानी आयोजना निर्माण भएपछि बजार क्षेत्रमा खानेपानीको समस्या अन्त्य हुन्छ भनेर दावी नगरिएको पनि होइन । करिब ४४ करोड भन्दाबढीको लागतमा आयोजना बनेपनि सदरमुकामबासीलाई पानीको अभाव अहिलेपनि उस्तै छ । बजार क्षेत्र वरपर नै खोलखोले, चाइनिज धारा, बोसेपानी धारा, रङशाला लगायतका स्थानमा झण्डै आधा दर्जन भन्दाबढी मूलको पानी आउने सार्वजनिक धाराहरु पनि छन् ।
ति सवै धारामा विहानदेखि राती अवेरसम्म पानी भर्नेको घुइँचो हुने गरेको छ । दिनमा मात्र होइन रातको समयमा पनि सदरमुकामबासी खानेपानीका लागि घण्टौसम्म लाइन बस्नुपर्ने बाध्यताले हैरान छन् । सदरमुकाम क्षेत्रमा खानेपानी वितरण गर्दै आएको आयोजनाहरुले नियमित पानी उपलब्ध नगराउने र सार्वजनिकस्थानमा रहेका धारामा समेत पानीको मुहान सुक्न थालेपछि उपभोक्ता समस्यामा पर्न थालेको अर्का स्थानीय रामकृष्ण खत्रीले बताउनुभयो ।
‘‘घरमा पानीको धारा आउन पनि मुस्किल छ, उहाँले भन्नुभयो, ‘‘सानो धारा, धेरैजना पानी भर्नका लागि पुग्ने गरेकाले समय लाग्ने गरेको हो ।’’ । परम्परागत सार्वजनिक धाराका पानी समेत व्यवस्थित गर्न नसक्दा समस्या भएको स्थानीयबासीहरु बताउछन् ।
सदरमुकाममा दरौँदी लिफ्टिङ, पृथ्वीनारायण साना शहरी खानेपानी आयोजना, थाकल डाँडा, पोखरीथोकलगायत गरी बिभिन्न ६ वटाभन्दा बढी आयोजनाले बजार क्षेत्रमा उपभोक्तालाई खानेपानी वितरण गर्दै आएको छ । तर नियमित धारामा पानी नआउदा उपभोक्ताले समस्या भोग्नु परेको हो ।
