गोरखा, २० चैत । बसन्त ऋतुको आगमनसंगै ढकमक्क लागीगुँरास फूल्न थालेपछि लाप्राकमा आन्तरिक तथा बाह्य पर्यटक बढ्न थालेको छ । धार्चे गाउँपालिका–४ मा पर्ने लाप्राकका डाँडाहरु लालीगुँरासको फुलले मनमोहक देखिन थालेपछि त्यस क्षेत्रमा पर्यटकहरुको आर्कषण बढेको हो ।
‘‘लालिगुराँस फुल्न थालेपछि अघिपछि भन्दा धेरै पर्यटकहरु लाप्राक आउनेजाने क्रम बढेको छ, वडाध्यक्ष किसान गुरुङले भन्नुभयो, ‘‘डाँडाभरी बिभिन्न रङका लालिगुराँसका फुल प्राकृतिक सौन्र्दयताले भरिपूर्ण यस क्षेत्रमा झनै सुन्दरता थपिएको छ ।’’
लालीगुराँस फुलेको हेर्नका लागि केही दिनदेखि पर्यटकहरुको भीड नै लाग्ने गरेको उहाँको भनाई छ । पर्यटकको बृद्धि भएसंगै बारपाक लाप्राक लगायतका पर्यटकीय क्षेत्रहरुमा चहलपलह समेत बढेको छ ।
वडाध्यक्ष गुरुङले लालीगुराँसको फुलको आर्कषणले समेत लाप्राकको आन्तरिक तथा बाह्य पर्यटन प्रर्वद्धनमा महत्वपूर्ण भूमिका खेलेको बताउनुभयो । हिउँदको समयमा हिउँ परेपछि हिउँ खेल्न आउने पर्यटकहरूको चाप उस्तै हुन्छ, उहाँले भन्नुभयो, ‘‘अहिले लाप्राकमा रहेको पुसडाँडाको जङ्गलमा लालीगुराँस फुलेर ढकमक्क भएसंगै अझबढी आन्तरिक पर्यटकको रोजाइमा लाप्राक पर्नेगरेको छ ।’’
पर्यटक बढ्न थालेपछि होटल व्यवसायीहरु समेत खुशी भएका छन् ।लाप्राककी होटल व्यवसायी स्नेह गुरुङले लालीगुराँस फुलेको हेर्न आउने पर्यटकहरुले लाप्राकका अधिकांस होटलहरु भरिभराउ भएको बताउनुभयो ।
भुकम्पपछि पुरानो लाप्राकको वस्तीलाई स्थानान्तरण गर्नका लागि गुप्सीपाखामा निर्माण गरेको एकिकृत नमुनाबस्ती पनि लाप्राकको अर्को आर्कषक पर्यटकीय गन्तव्य हो ।
गुप्सी पाखा नमुनावस्तीमा रहेका एउटै मोडलका ५ सय ७३ घर अत्यन्तै आर्कषक देखिन्छ । उक्त बस्तीमा गुप्सीपाखा सामुदायिक होमस्टे समेत सञ्चालनमा आएको छ ।
पर्यटकको संख्या बढ्न थालेपछि होमस्टेमा समेत राम्रो व्यापार हुन थालेको होमस्टे सञ्चालक समितिका अध्यक्ष होमसिंह गुरुङले जानकारी दिनुभयो ।
