गोरखा, १३ फागुन । राष्ट्रिय अभियानका रुपमा सुरु गर्न लागिएको दादुरा रुबेलाको खोप कार्यक्रम अन्तरर्गत गोरखामा आजदेखी करिब १७ हजार जना बालबालिकालाई दिन थालिएको छ । अभियानको एक कार्यक्रम बिच जिल्ला समन्वय समितिका प्रमुख मोहनबहादुर थापा मगरले आइसबक्स स्वास्थ्यकर्मीहरुलाई हस्तान्तरण गरेर सुरुवात गर्नुभएको छ ।
थापाले आजसदरमुकाममा भएको कार्यक्रममा स्वास्थ्य कार्यालयबाट प्राप्त खोप सहितको आइसबक्स स्वास्थ्यकर्मीहरुलाई हस्तान्तरण गरेर अभियानको सूरुवात गर्नुभएको हो ।
जिल्ला भित्रका ९ महिना उमेर पूरा गरी ५ वर्षभित्रका सबै बालबालिकालाई तालिमप्राप्त स्वास्थ्यकर्मीबाट मात्र खोप दिन थालिएको स्वास्थ्य कार्यालय गोरखाका जन स्वास्थ्य निरिक्षक नानीबावु दानीले जानकारी दिनुभयो ।
जिल्लाभरी फागुन १६ देखि २२ गतेसम्म सबै स्वास्थ्य संस्था र खोप केन्द्रमा खोप अभियान सञ्चालन गरीने भएता पनि प्रदेश स्तरमा आजैदेखी सुरुवात गरेको अवशरमा गोरखामा पनि सिम्बोलिक रुपमा आजको दिन सुरु गरीएको जनस्वास्थ्य निरिक्षक दानीले बताउनुभयो । उहाँका अनुसार जिल्ला भित्र ९ महिना उमेर पूरा गरी ५ वर्षभित्रका १६ हजार ८९० जना बालबालिकालाई खोप लगाईने छ ।
बेलाबेलामा नेपालमा दादुराको महामारी फैलिने गरेकाले यस प्रकारको खोप अभियान अझै प्रभावकारी ढङ्गले गर्नुपर्ने टड्कारो आवश्यकता छ । त्यसैले समुदायमा रहेका लक्षित समूहको कुनै पनि बालबालिका खोपबाट वञ्चित नहुन् भनी बढी सजगता अपनाइएको छ कार्यालयले जनाएको छ ।
उक्त कार्यक्रमका लागि जिल्लामा २६९ जना स्वास्थ्यकर्मीहरु परिचालित हुने छन् । २६७ वटा स्वास्थ्य संस्थाबाट बालबालिकालाई खोप सेवा प्रदान गर्न लागिएको निरिक्षक दानीले जानकारी दिनुभयो ।
दादुरा तथा रुबेला दुवै रोग अत्यन्त सङ्क्रामक रहेको र बालबालिकालाई यी रोगले बढी सङ्क्रमण गर्ने विश्व स्वास्थ्य सङ्गठनको भनाइ छ । सरकारले सन् २०२६ सम्म नेपालबाट दादुरा रुबेला रोग निवारण गर्ने लक्ष्य राखेको छ ।
नेपालमा ४५ वर्षदेखि दादुराको खोप र पछिल्लो १० बर्षभन्दा बढी समयदेखि रुबेलासमेतको गरी संयुक्त रुपमा १६ हजारभन्दा बढी खोप केन्द्रबाट प्रदान गर्ने गरिएको छ ।
सन् २००४ देखि हालसम्म हरेक ४–४ वर्षमा अभियानका रुपमा पनि यो खोप लगाइदै आइरहे पनि बेला बेलामा महामारी फैलिने गरेको छ ।
